"Архангел урмансылығы" эшсәндәре өсөн ҡыҙыу осор башланды. Әлеге мәлдә "Ағас ултырт" акцияһында "йәшел ҡалҡан" хеҙмәткәрҙәренән тыш, район хакимиәте, мәғариф бүлеге, мәҙәниәт йорто, "Инйәр" гәзите редакцияһы, Архангелдең 1-се һәм 2-се мәктәптәре, ветеринар станцияһы, ер һәм мөлкәткә идара итеү комитеты, мәшғүллек үҙәге, финанс идаралығы коллективтары ла ситтә ҡалманы.
– Үҫентеләр Ырныҡшы ауылы эргәһендәге питомниктан килтерелде. Архангел ауылы эргәһендә 15 гектар майҙанда гектарына 3,5-4 мең йәш ҡарағай ултыртылды. Ғөмүмән, урман тергеҙеү эше йыл әйләнәһенә хәстәрләнә. Былтыр ошо биләмәне һөрөп урын әҙерләнде. Һәр кеше үҙ ғүмерендә бер тапҡыр булһа ла ағас ултыртырға бурыслы. Урман – беҙҙең һаулығыбыҙ һәм байлығыбыҙ. Бөгөн ултыртыласаҡ ағас үҫентеләренең киләсәк быуын өсөн әһәмиәте ҙур, – тине Архангел участка урмансыһы А. В. Киселев.