Йыл башында ғәмәлгә индерелгән “Герой балалар” проектының башланғысын Башҡортостан Республикаһында Бала хоҡуҡтары буйынса вәкил Милана Скоробогатова тәҡдим иткәйне. Уның әйтеүенсә, “герой” исеменә ҡала һәм райондарҙан 60-ҡа яҡын бала дәғүә итә.
“Герой балалар” проекты яҡынына ярҙамға килергә әҙер булғандарҙы бергә йыйҙы. Ғәҙәттән тыш хәлгә эләгеп, ололарға хас ҡаһарманлыҡ ҡылғандарҙың береһе — Күмертау ҡалаһынан Семен Давыдов. Былтыр ул кескәй туғандарын янғындан ҡотҡара. Малай күп балалы ғаиләлә үҫә. Әсәһе әйтеүенсә, 11 йәшлек Семен — иң ҙур ярҙамсыһы. Нефтекаманан 9 йәшлек Никита Баранов ете йәшендә кескәй туғанын һыулы траншеянан алып сыға.
— Әле 18 бала һайлап алынды. Уларға Халыҡ-ара балаларҙы яҡлау көнөндә бүләк тапшырыу мәсьәләһе хәл ителә. Республика етәкселеге кескәй батырҙарға рәхмәт хаттары, бүләктәр, республика һәм федераль лагерҙарға, шифаханаларға юллама тапшырасаҡ, — тине Милана Скоробогатова.