Юбилярҙы район хакимиәте башлығы Алмас Йосопов, уның социаль һәм кадрҙар сәйәсәте буйынса урынбаҫары Илдар Ахунов, ветерандарҙың район советы етәксеһе Рәйес Латипов һәм Баҡай ауыл Советы хакимиәте башлығы Шамил Әсмәндиәров ҡотланы. Ҡунаҡтар, әлбиттә, буш ҡул менән килмәгән, улар инәйгә сәскә гөлләмәләре һәм бүләктәр тапшырҙы. Иң ҙур бүләк Рәсәй Президенты Владимир Путиндың ҡотлауы булды. Уны ауыл старостаһы Флүрә Сатаева уҡып ишеттерҙе.
...Хәнифә Рәсмәкәй ауылында биш балалы ғаиләлә тыуып үҫә. Ошонда һылыу ҡыҙ булып буй еткерә. Ире Мамалим Абдрафиҡов менән Мәүлет ауылында төпләнәләр. Ләкин фашистарҙың Тыуған илебеҙгә баҫып инеүе, ҡот осҡос һуғыш башланыуы ғаиләнең матур тормошон, яҡты хыялдарын селпәрәмә килтерә. Мамалимды фронтҡа алалар, Хәнифә өс бала менән тороп ҡала.
– Ифрат ауыр йылдар ине, – тип иҫләй йөҙйәшәр. – Аслыҡ-яланғаслыҡ хөкөм һөрҙө. Ҡайғы яңғыҙ йөрөмәй, тиҙәр бит: ун ғына айлыҡ кесе улым вафат булды. Фронттан ҡурҡыныс хәбәр алдым – Мамалим хәбәрһеҙ юғалған. Ләкин нисек тә йәшәргә, балаларҙы үҫтерергә кәрәк ине.
Һуғыш тамамланһа ла, хәсрәт-борсоуҙарҙың аҙағы күренмәй: ҡот осҡос янғын Хәнифәнең өйөн көлгә әйләндерә, ғаилә урамда ҡала. Ярай әле, колхоз ярҙам ҡулы һуҙа: бер йәй эсендә яңы йорт һалып бирә. Хужабикә бөгөн дә шунда ғүмер итә.
Яңғыҙ ҡатынға балаларын аяҡҡа баҫтырыу ауыр була, шуға ла Шәйхулла Низаметдиновҡа тормошҡа сыға. Ире яҡшы атай, хәстәрлекле хужа була, шатлыҡ өҫтәп, уртаҡ ҡыҙҙары Римма тыуа. Шәйхулланың бар эшкә лә ҡулы ята: ауылдаштарына өй, мунса һала, уңғанлығы менән ихтирам ҡаҙана ул. Бергә-бергә бәхетле оҙон ғүмер кисерә Низаметдиновтар. Тик ғаилә башлығы ҡаты ауырып, 85 йәшендә вафат була.
Хәҙерге ваҡытта Хәнифә инәйҙе оло ҡыҙы Рида ҡарай.
– 78 йәшкә етһәм дә, һаман әсәй өсөн бала булып ҡалам, – тип көлә ул. – Әсәйебеҙ аралашыусан, ҡунаҡ килгәнде ярата. Матур йырлай, бәйет, таҡмаҡтар сығара. Күңеле гел яҡшылыҡта, кешеләргә иғтибарлы. Уларҙың быуынына бихисап ҡыйынлыҡ күрергә тура килгән, бындай ҡайғы һәм хәсрәтте Хоҙай бер кемгә лә күрһәтмәһен. Ата-бабабыҙ ауыр саҡтарҙа һынатмаған, яманлыҡты ситкә ҡуйып, яҡшылыҡҡа ышанып йәшәгән...
Оҙон ғүмерле Хәнифә апайҙы туғандары һәм яҡындары иғтибар һәм хәстәрлек менән солғап алған. Аллаһ Тәғәлә уға ғүмер бүләк итеп кенә ҡалмаған, теүәл аҡыл һәм асыҡ зиһенен дә һаҡлаған. Юбиляр бөгөн дә күҙлекһеҙ уҡый. Киләсәктә лә көндәрен яҡын кешеләренең йылыһы һәм мөхәббәте яҡтыртһын!