Өфө ирекмәндәре һәүәҫкәр һәм профессиональ фотографтарҙы Еңеү көнөнә арналған хәйриә акцияһында ҡатнашырға саҡыра.
Улар 9 Майҙа ветерандарҙы бушлай фотоға төшөрөп, һүрәтте эшләтеп, эйәләренә тапшырырға тәҡдим итә. Баш ҡалалағы Еңеү, Матросов, Якутов, Ғафури исемендәге, “Дим” мәҙәниәт һәм ял парктары сара урыны тип һайланды.
— Һәр ветеранға сәскә тапшырырға ла теләйбеҙ. Әйҙәгеҙ, яугирҙәргә бәхетле минуттар бүләк итәйек, — тине акцияны ойоштороусыларҙың береһе Элеонора Ситдиҡова.
Л. ИҪӘНҒОЛОВА.
* 9, 10 һәм 11 майҙа Бөйөк Ватан һуғышы ветерандары Өфө борамдарында һәм арҡанлы һауа юлдарында бушлай йөрөйәсәк. Ҡаланың Йылға кисеүҙәре хеҙмәтенән ошо хаҡта хәбәр иттеләр.
* Бөгөн Башҡорт дәүләт аграр университетының “Йәштәр һарайы”нда йәш башҡарыусыларҙың “Бөйөк Еңеүҙе данлап!” республика патриотик йыр конкурсының гала-концерты була. Унда һуғыш ветерандары ла саҡырылған.