Баш ҡаланың Салауат Юлаев исемендәге майҙанында илебеҙҙә иң ҙур — 179 килограмлыҡ — бауырһаҡ бешерелде. Уны әҙерләүгә 1 006 йомортҡа, 25 килограмм шәкәр, 70 килограмға яҡын он, 50 килограмм башҡорт балы киткән. Сараны “Юлдаш ҒМ” радиостанцияһы ойошторҙо.
Өфө хакимиәтенең матбуғат хеҙмәтенән хәбәр итеүҙәренсә, рекордты теркәү өсөн Өфөгә Рәсәй Рекордтар китабының баш мөхәррире Станислав Коненко килгән. Был көндө һәр кем махсус китапта иҫтәлеккә яҙма ҡалдырып, ҙур бауырһаҡ эргәһендә фотоға төшөп, ваҡиғаға үҙенең ҡатнашлығын күрһәтергә тырышты. Тәмлекәстән бер өлөш киҫеп алынып, Рәсәй Президенты Владимир Путинға оҙатылды.
Милли ризыҡты бешереүгә бер нисә сәғәт сарыф ителде. Ошо ваҡытта сәхнәлә тамаша барҙы: “Өфө тулҡындары” фестивалендә ҡатнашыусылар үҙҙәренең иң яҡшы йырҙарын башҡарҙы, “Юлдаш ҒМ” тапшырыуын алып барған Трофим Татарников, Елена Ремпель һәм Борис Быстров төрлө бәйгеләр, уйындар ойошторҙо. Төп бүләк, скутер, Ҡырмыҫҡалы районының Түбәнге Төкөн ауылына юлланды. Уны яулаған Гөлназ Хәсәнованың бауырһағы 12 килограмдан ауырыраҡ тартҡан икән.