Башҡортостан Прокуратураһында хәбәр итеүҙәренсә, баш ҡаланың Свердлов урамындағы 82/9-сы йортта йәшәүселәр хоҡуҡтары боҙолоуы тураһында ғариза менән мөрәжәғәт иткән. Был йорт 70 йыл элек төҙөлгән булған, комиссия һығымтаһына ярашлы, бик ныҡ иҫкергән.
— 2012 йылда муниципалитет вәкилдәренән торған ведомство-ара комиссия бинаны авария хәлендә булыуға бәйле һүтелергә тейеш тип таныған, әммә ҡала хакимиәте халыҡты иҫке йорттан күсермәгән, — тип билдәләнеләр күҙәтеү ведомствоһында.
Граждандар иҙән-түбәләре ишелеп торған, йылытыу селтәре сафтан сыҡҡан йортта йәшәүен дауам иткән. Өфө прокуратураһы хакимиәткә торлаҡ бүлеү бурысын йөкмәткән. Әле биш ғаиләгә фатир бирелгән. Был мәсьәлә хәҙер прокуратураның даими контролендә.