Эш һөйгәндең дәрәжәһе артыр, ти халыҡ мәҡәле. Ысынлап та, үҙ эшен бар күңелен һалып башҡарғандар ғына юғары һөҙөмтәләргә өлгәшә, ҡаҙаныштар яулай. «Кусимов» йәмғиәте механизаторы Наил Хәйбуллин да — шундайҙар иҫәбендә.
Мәктәпте тамамлағас, ул тракторсыға уҡый һәм ике тиҫтә йылға яҡын һайлаған һөнәренә тоғро ҡала. Сәсеү осоронда үҙенең Т-150 тракторында юғары һөҙөмтәгә өлгәшеп, бер нисә йыл рәттән «Сәсеү батыры» исемен яулай. Башҡа мөһим ауыл хужалығы кампаниялары осоронда ла алдынғылыҡты бирмәй. Былтыр өр-яңы комбайн «йүгәнләп», ҡышҡылыҡҡа сенаж, силос әҙерләүҙә ең һыҙғанып эшләне.
Тырыш механизаторҙың хеҙмәте лайыҡлы баһаланды. Өфөлә республиканың ауыл хужалығы эшсәндәре тәбрикләнгән тантанала Наил Иршат улы Башҡортостан Республикаһының Почет грамотаһы менән бүләкләнде.