Һәләтле педагог өсөн был төп ярыштың тәүге этабы ғына ине. Уға артабан Башҡортостан мәғарифының данын ил кимәлендә яҡлау бурысы ҡуйылды. Алдан уҡ шуны әйтеп китәйем: һынатманы Зөлфиә!
Конкурстың тәүге турында Рәсәйҙең төрлө төбәгенән 57 уҡытыусы жюри ағзаларына дәрес өлгөләре, видеояҙмалар, фәнни-ғәмәли мәҡәләләр, эш алымдары хаҡында мәғлүмәттәрен ебәрҙе. Һөҙөмтәлә икенсе турға 24 уҡытыусы үтте. Улар сәхнәлә педагогик һәләтен күрһәтергә, үҙе менән таныштырырға тейеш ине. Башҡортостан һылыуы Зөлфиә Баяҙғолова бай тәжрибәһе, һәләте, заман талаптарына ярашлы төплө белеме, тәрбиә биреү оҫталығы, методиканы тәрән аңлауы менән жюри ағзаларын әсир итте. Эйе, педагог, ысынлап та, эште яҡшы итеп ойоштора, уҡыусыларын илдең, республиканың лайыҡлы шәхесе итеп формалаштырыу маҡсаты менән янып йәшәй. Йәш быуындың телгә, әҙәбиәткә ҡыҙыҡһыныуын арттырыу маҡсатында төрлө конкурс, конференция, ғилми тикшеренеү эштәре ойоштора. Был сараларҙа уҡыусылар ҙа фекерен ҡыйыу әйтә ала, бәхәстәрҙә ҡатнаша.
Ошолай эше менән халыҡ араһында ҙур ихтирам яулаған Зөлфиә Баяҙғоловаға конкурсҡа әҙерләнгән ваҡытта һәр кем, шул иҫәптән туған коллективы, БДУ-ның Стәрлетамаҡ филиалы, республиканың Мәғарифты үҫтереү институты, Мәғариф министрлығы ҙур ярҙам күрһәтте. Һөҙөмтәлә илебеҙҙең баш ҡалаһында башҡорт телендә дәрес биреп, милли кейемдә халҡыбыҙҙы, мәҙәниәтебеҙҙе данлап, Зөлфиә конкурста икенсе урынды яуланы! Был ҙур еңеү барлыҡ республикабыҙ өсөн ҙур ҡаҙаныш булды.
Эйе, Мостай Кәрим, Зәйнәб Биишева, Рәми Ғарипов кеүек арҙаҡлы шәхестәребеҙ заманында телебеҙҙе үҫтереүгә, һаҡлауға күп көс һалған. Был юлды лайыҡлы дауам итергә бурыслыбыҙ. Ошо йәһәттән башҡорт теле һәм әҙәбиәте уҡытыусыларының, шул иҫәптән Зөлфиә Баяҙғолованың, хеҙмәте баһалап бөткөһөҙ. Халҡыбыҙҙың рух байлығын, бөйөклөгөн Мәскәүҙә иҫбат итерлек ошондай педагогтарыбыҙ булғанда, телебеҙҙең яҡты киләсәгенә ышаныс тағы ла арта.



Һүҙ – бәйгеселәргә:

Шәмсетдин МАГАМДАРОВ, Дағстан Республикаһының Сөләймән-Стальский районындағы Рамзан Османов исемендәге Герейхан урта мәктәбенең лезгин теле уҡытыусыһы, конкурста беренсе урынды яулаған:
— Конкурста ҡатнашыуыма бик шатмын. Төрлө төбәктәрҙән килгән вәкилдәр менән аралашып, бик күп дуҫ таптым. Һәр ҡатнашыусы үҙенсә көслө, белгестәрҙең әҙерлек кимәле лә юғары.

Ляна Гагиева, Владикавказ ҡалаһындағы 27-се мәктәптең осетин теле һәм әҙәбиәте уҡытыусыһы:
— Быға тиклем Бөтә Рәсәй кимәлендә үткән конкурстарҙа ҡатнашҡаным юҡ ине, былтыр мәғариф бүлеге вәкиле булып килгәйнем. Үткән йыл менән сағыштырғанда, конкурсанттар күпкә аҙайған, шуға ҡарамаҫтан, жюри ағзаларына иң яҡшы уҡытыусыны һайлап алыуы ҡыйын, сөнки һәр ҡатнашыусы үҙенсәлекле. Уларҙың һәр береһе — талантлы, тәрән фекер йөрөткән шәхестәр. Барыһы ла ҙур баһаға эйә, айырып ҡарау мөмкин дә түгел.

Игорь Аибычаков, Хаҡас Республикаһы вәкиле, конкурста өсөнсө урын алған:
— Был байрамға ярышыр өсөн түгел, ә тәжрибә уртаҡлашыу маҡсатында йыйылғанбыҙ, тип уйлайым. Туған телдәрен яратып, уны ҡурсалап, һаҡлап алып ҡалыу кеүек бер үк проблема менән күҙгә-күҙ осрашҡан уҡытыусылар килгән бында. Был өлкәлә ыңғай ҙа, кире лә күренештәр бар, тип әйтергә мөмкин. Мәҫәлән, беҙҙә Хөкүмәт кимәлендә хаҡас телен һаҡлап ҡалыу программаһы теүәл үтәлә һәм ыңғай һөҙөмтә бирә башланы. Хаҡас теле уҡытыусыларына эш хаҡына өҫтәп 15 процент түләү индерелде, шулай уҡ дәрестәр һаны артты, уҡыу бүлмәләрендә заманса, ҡыйбатлы йыһаздар урынлаштырылды.

Эльдар ФӘТТӘХОВ яҙып алды.