Мәҙәниәт йорто фойеһында һәр кем хужалыҡтар һәм предприятиелар эшмәкәрлегенең һөҙөмтәләре менән таныша алды. Өҫтәлдәргә “Гермес” етештереү берекмәһенең ҡабарып бешкән икмәк-ҡаластары ҡуйылған. “Башҡорт ҡаҙы”, “Регион-Сервис” йәмғиәттәре, Федоровка һөт заводы, В.В. Ветровтың крәҫтиән (фермер) хужалығы үҙ продукцияһын тәҡдим итте.
Сараға килгән ҡунаҡтар ҙур ҡәнәғәтлек менән күргәҙмәне ҡарап сыҡты. “Регион-Сервис” яуаплылығы сикләнгән бүлендек йәмғиәте стенды эргәһендә Башҡортостандың ауыл хужалығы министры һөттөң һатылыу хаҡы менән ҡыҙыҡһынды. “Башҡорт ҡаҙы” йәмғиәте вәкиленән ул продукцияны һатыу барышы хаҡында һораны. Етәксе шулай уҡ иген тупламы, аграрийҙарҙың башҡа проблемалары тураһында һорауҙар бирҙе. Ҡайһы бер мөһим мәсьәләләрҙе ошонда уҡ хәл итте.
Байрамдың рәсми өлөшөндә 2013 йылғы эш йомғаҡтары буйынса район хакимиәте башлығы Радик Ишмөхәмәтов сығыш яһаны. Ул ауыл хужалығы предприятиеларының һәм ойошмаларҙың уңыштары хаҡында һөйләне. Былтыр 46,6 мең гектар ергә — иген, 3,2 мең гектарҙа — шәкәр сөгөлдөрө, 8,2 мең гектарҙа көнбағыш сәселгән. Район буйынса игендең тулайым йыйымы 60,8 мең тонна тәшкил иткән. Сөгөлдөр сәскән хужалыҡтар өсөн йыл бигерәк тә уңышлы булған. Фрунзе исемендәге, “Искра” ауыл хужалығы кооперативтары, “Сәйет” йәмғиәте, Ибраһимовтың крәҫтиән (фермер) хужалығы айырыуса мул уңыш алған. Ауыл хужалығы предприятиеларында 8 400 тоннаға яҡын һөт етештерелгән. Был 2012 йылға ҡарағанда күберәк. “Нива”, “Азат”, “Искра”, Фрунзе исемендәге хужалыҡтар һөт һауыу һәм етештереү йәһәтенән яҡшы һөҙөмтәгә өлгәшкән.
Йыл һайын тоҡомло мал күпләп һатып алына. Былтыр, мәҫәлән, “Нива” йәмғиәте симменталь тоҡомло 55 тана, “Искра” кооперативы ҡара-сыбар тоҡомло 59 тана һатып алған. Һуңғы йылдарҙа хужалыҡтарҙың машина-трактор паркын яңыртыуға ла ҙур иғтибар бүленә. 2012—2013 йылдарҙа 170 миллион һумлыҡ 169 берәмек техника һәм ҡорамал, шул иҫәптән 48 миллионлыҡ 11 комбайн һатып алынған. Былтыр ауыл хужалығы етештереүселәренә федераль һәм республика ҡаҙнаһынан 94 миллион һум аҡса бүленгән.
Радик Ғилметдин улы ауыл хужалығы эшсәндәренә һәм ветерандарына башҡарылған эш өсөн рәхмәт белдереп, киләһе йылға бурыстарҙы һанап сыҡты.
Николай Коваленко үҙенең сығышында район эшсәндәренең былтырғы эш һөҙөмтәһенә ыңғай баһа бирҙе, уларҙың байрамды яҡшы күрһәткестәр менән ҡаршылауын билдәләне. Ауыл хужалығы продукцияһының тулайым күләме элгәре йыл менән сағыштырғанда 15 процентҡа артҡан. Министр шулай уҡ ауыл етештереүселәренә күрһәтелгән дәүләт ярҙамы алымдары хаҡында һөйләне, алдынғыларға маҡтау грамоталары тапшырҙы.
Мәләүез ит-консерва комбинатының генераль директоры Лариса Малахова менән “Башҡорт ҡаҙы” компаниялар төркөмөнөң генераль директоры Рәсим Сәйетбатталов ауыл эшсәндәрен ихлас ҡотлап, уларға сертификаттар, иҫтәлекле бүләктәр тапшырҙы. Байрамды сағыу концерт дауам итте.