Башҡортостан Хөкүмәте Президиумының һаулыҡ һаҡлау өлкәһен үҫтереүгә арналған ултырышында мөһим мәсьәләләр ҡаралды.

— Ябай кешене миллиард һумдарға һатып алынған аппаратура һаны ҡыҙыҡһындырмай. Уға медицинаның һәр кем файҙалана алырлыҡ булыуы, хеҙмәткәрҙәрҙең йылы мөнәсәбәте, дәүләт тарафынан гарантиялар ҡаралыуы мөһим. Ә беҙгә, республикала идара итеүселәргә, күрһәткестәр, айырым алғанда яҡшы демография кәрәк, — тине Президент Рөстәм Хәмитов.
Һуңғы өс йылда һаулыҡ һаҡлауҙы замансалаштырыу буйынса программаны тормошҡа ашырыу өсөн 16,5 миллиард һум аҡса бүленгән. Был сумманың иң күп өлөшө матди-техник базаны яңыртыуға, ярҙам күрһәтеүҙең берҙәм стандарттары системаларын ғәмәлгә ашырыуға, учреждениеларҙы мәғлүмәтләштереүгә йүнәлтелгән. Иң мөһиме — халыҡтың төрлө сирҙәр менән яфаланыуы кәмей башлаған. Былтыр 1 мең кешегә 847 ауырыу тура килгән.
Әйткәндәй, һуңғы йылдарҙа Башҡортостанда демография күрһәткестәре, Рәсәйҙеке менән сағыштырғанда, юғарыраҡ. Әммә, ҡыҙғанысҡа ҡаршы, былтырғы ошо уҡ осор менән сағыштырғанда үлем осраҡтарының артыуы күҙәтелә.