Халҡыбыҙ күршеһенә, танышына ғына түгел, ете ятҡа ла бәлә килгәндә вайымһыҙ ҡала торғандарҙан түгел. Быға һуңғы осорҙа ғына ла күп тапҡыр инандыҡ. Бергәләп күтәргәндә ҡайғы-юғалтыуҙар ҙа еңеләйә. Әле республикабыҙҙың Әбйәлил, Белорет райондары халҡы ташҡындан ҙур зыян күрҙе. Ҡойма ямғыр үтте лә китте, ә уның эҙемтәһе булып емереклек, юҡлыҡ, ҙур мәшәҡәттәр ҡалды.

Эйе, бөгөн был төбәктәрҙә хәл шәптән түгел. Хәйерһеҙ ташҡындың мул уңышты йыйыу ваҡытына тура килеүе хәлде бермә-бер киҫкенләштерҙе. Халыҡтың яҙ, йәй буйы үҫтергән йәшелсәһен, емеш-еләген, бәрәңгеһен һыу йыуып алып китте. Ә ҡышын мал-тыуарҙы аҫрар өсөн әҙерләнгән бесән кәбәндәре, һалам эҫкерттәре һуң? Баҫыуҙарҙа бына-бына уңыш бирер иген дә һыу аҫтында серене. Ауыл халҡы, тотош район өсөн бына ошо ул ҙур ҡаза.
“Башҡортостан” гәзите редакцияһы коллективы был күңелһеҙ хәлгә битараф ҡала алманы. Республикабыҙҙың төп баҫмаларының береһе бәләгә тарыған райондарға мәғлүмәти ярҙам күрһәтеүҙе үҙенең мөҡәддәс бурысы тип иҫәпләй. Беҙ тәү сиратта республиканың ташҡындан һәм ҡоролоҡтан зыян күрмәгән райондарына, ундағы хужалыҡ етәкселәренә һәм ҡулынан килгән һәр кемгә мөрәжәғәт итәбеҙ. Милләттәштәребеҙгә иген, картуф, йәшелсә, бесән, һалам бик кәрәк. Бөгөн барыбыҙҙан да ярҙамсыллыҡ, миһырбанлылыҡ һәм кеше ҡайғыһын аңлай белеү талап ителә.
Ярҙамды аҡсалата күрһәтергә лә мөмкин. Әйткәндәй, был йәһәттән редакция хеҙмәткәрҙәре лә тырышты. Һәр кем үҙенең бер көнлөк эш хаҡын бәлә күргән райондарға ярҙам иҫәбенә күсерҙе лә инде. Бер кеше өсөн был бик ҙур аҡса тойолмаһа ла, күмәклегебеҙҙе иҫәпкә алғанда, шаҡтай ғына йыйыла. Ошо йәһәттән беҙ республиканың төрлө ойошмалары етәкселәренә һәм хеҙмәткәрҙәренә мөрәжәғәт итәбеҙ: әйҙәгеҙ, һеҙ ҙә, беҙҙән үрнәк алып, мөмкинлегегеҙгә ҡарап, матди ярҙам күрһәтегеҙ!
Аҡсаны түбәндәге реквизиттар буйынса махсус иҫәпкә күсерергә мөмкин:
Реквизиты банка:
БФ МР Абзелиловский район РБ
ИНН 0201995162 КПП 020101001
Банк получателя: ОАО “Социнвестбанк”, г. Уфа
р/сч: 40703810001150000054
БИК: 048073739
к/сч: 301018109000000000739.
Әбйәлил районының ҡайһы бер ауылдарына әйберләтә лә ярҙам талап ителә. Шуға күрә “Башҡортостан” гәзите йәнә акция иғлан итә: 20 авгусҡа тиклем гуманитар ярҙам йыйыу ойошторола. Зыян күреүселәргә һәйбәт тороштағы кейем-һалым, аяҡ кейемдәре, көнкүреш техникаһы, һауыт-һаба, уйынсыҡтар, китаптар — бөтәһе лә бик кәрәк. Әйберҙәрҙең иҫке булмаҫҡа тейешлеген аңлайһығыҙҙыр. Уларҙы беҙҙең редакцияға килтерә алаһығыҙ.
мөхәрририәт.