Башҡорт ере элек-электән күрәҙәлек итеү, дауалау һәләтенә эйә имселәре, әүлиәләре менән дан тота. Үҙенсәлекле һәләт эйәләренең береһе — Көйөргәҙе районының Таймаҫ ауылында йәшәүсе өләсәйем Мәүлиҙә Мәҡсүтова.

Күңел күҙе менән кешеләрҙең тормош юлын көҙгөләгеләй күргән, сирен тойған һәм ҡулынан килгән йылы тулҡындар ярҙамында дауалай алған өләсәйемдең яҙмышы юғалтыуҙар, үкенестәр, ҡайғы-хәсрәт сылбырынан үрелгән. Бөгөн ул һәр көнөн мохтаждарға ярҙам итеүгә бағышлай: өмөтө һүрелгәнгә ышаныс өҫтәй, кәңәштәр бирә, сирлеләрҙе дауалай, бағымсылай, юғалған әйберҙәрҙе табыша.
— Бала саҡта табип булырға хыялланғайным, әммә күмәк ғаиләнән беребеҙгә лә юғары уҡыу йортонда белем алыу бәхете теймәне. Алты йәшемдә атайым үлеп киткәс, донъя көтөүе ауыр булды, — тип үткәндәрен иҫкә төшөрә ҡәҙерлебеҙ. — Беҙ, өлкәндәр, әсәйгә өй эштәрендә, бәләкәйерәк туғандарыбыҙҙы ҡарауҙа төп терәк-таяныс булдыҡ. Күптәребеҙ, мәктәпте ташлап, эшкә урынлашты. Етебеҙ араһынан бер үҙем унынсыны тамамланым. Салауаттағы медицина училищеһына йүнәлтмә лә алғайным, тик паспорт юлларлыҡ аҡсам булмағас, уҡыуҙы кисектереп, һыйыр һауырға тотондом. Күңел төпкөлөнә инеп оялаған табип булыу хыялы барыбер йөрәгемде өтөп-өтөп ала торғайны. Хоҙай биргән булмышым үҙен шулай һиҙҙерткәндер, күрәһең.
Өләсәйемдең тормошона йәм өҫтәп, бер-бер артлы ғәзиз сабыйҙары донъяға килә. Бишенсеһен көткәндә олатайым вафат була. Өләсәй һәр балаһына матур тәрбиә, белем бирә, киләсәктәренә бәхет юрай. Балаларым ҡытлыҡ күрмәһен, үҙҙәрен башҡаларҙан кәм тоймаһын, етеш йәшәһен тип тырыша ул. Ҡыҙҙарын кейәүгә биреп, гөрләтеп туйҙар үткәрә. Дүртенсе балаһы Илсурҙы армияға оҙата.
Һәр береһенең тормошона ҡыуанып, ейән-ейәнсәрҙәренә һөйөнөп, шатлыҡ нурына ҡойоноп ҡына йәшәһә ине лә бит… Хоҙай уға тағы ла аяуһыҙ һынау ебәрә — Чечняла хеҙмәт иткән улының үлем хәбәрен ала. Киләсәккә ҙур өмөттәр бағлаған ғәзиз балаһы цинк табутта ҡайта. Бер ҡайғы алдында ла бөгөлөп төшмәгән өләсәйем төн эсендә ҡартая, хәлһеҙләнә. Мәрт хәлендә ике ай самаһы дауаханала ятҡандан һуң көс-хәл менән аңына килә. Кешеләрҙең үткәне, киләсәге көтмәгәндә күҙ алдына баҫа. Сихри йылылыҡҡа, мөғжизәле нурға тулған һул ҡулында дауалау көсө барлыҡҡа килә.
Өләсәйемдең шәл бәйләү оҫталығына ла һоҡланмаған кеше юҡ. Әйткәндәй, ул «Башҡорт шәле» бәйгеһендә гран-при яуланы. Үҙенә генә хас зауыҡ, оҫталыҡ менән башҡарылған ҡул эштәренән дә сихри йылылыҡ бөркөлә.