Гәзиттең сайтында (www.bash.bashgazet.ru) ҡайһы бер мәҡәләләр буйынса фекер алышыуҙар дауам итә. Уларҙың иң тостарына бөгөн туҡталырбыҙ. Был беҙгә уҡыусыны ниндәй мәсьәләләрҙең айырыуса ҡыҙыҡһындырыуын асыҡларға ярҙам итә. Иң уҡымлыларын иҫәпкә алып, артабан да ошо темаларҙы яҡтыртырға тырышырбыҙ. Уҡыусыларыбыҙ иһә йышыраҡ сайт киңлектәрен иңләп, фекерҙәре менән уртаҡлашыуын дауам итһен ине.

Башҡортостан Республикаһы Хөкүмәте Премьер-министрының халыҡты социаль яҡлау, һаулыҡ һаҡлау, мәғариф, мәҙәниәт мәсьәләләре буйынса урынбаҫары Лилиә Салауат ҡыҙы Ғүмәрова менән тура бәйләнеш үткәреүебеҙ тураһында хәбәр итеүебеҙ булды, редакция телефондары йышыраҡ шылтырай башланы. Республиканың һәр төбәгенән үҙ һорауы, борсолоуы, рәхмәт һүҙе менән мөрәжәғәт итеүселәр бихисап булды. Гәзитебеҙҙең тоғро дуҫы Рияз Мәсәлим сайтта мәҡәлә менән танышҡандан һуң ошондай һүҙҙәрҙе яҙған: "Дөрөҫөн әйтергә кәрәк, һуңғы ваҡытта республика идаралығында йәш һәм тәжрибәле белгестәр дәүләт чиновниктары кимәлендә эшләй. Лилиә Салауат ҡыҙы шулар араһында күренекле урын алып тора. Күпме күҙәтәм, яҡташым Лилиә һылыу һәр ваҡыт халыҡ вәкилдәре менән туранан-тура аралаша, башҡортса матур, йөкмәткеле әңгәмәләр алып бара. Рәхмәт инде Лилиә Салауат ҡыҙына!" – тигән. Беҙ ҙә был фекер менән килешәбеҙ һәм редакцияла шылтыраған телефондар, тура бәйләнеш мәлендә ҡушылған әңгәмәселәрҙең күплеге лә быға аныҡ дәлил булып тора. Әйткәндәй, Динә Арыҫланова менән Дилбәр Ишморатова ҡағыҙға теркәгән һөйләшеүҙе сайтта йөҙҙән ашыу кеше уҡып сыҡҡан.
Хәлил Сафиуллиндың "Көнлөксө хәленән сығырбыҙмы?" тигән мәҡәләһе сайтта бәхәс тыуҙырған. Мәҫәлән, Ҡунаҡбикә псевдонимы аҫтында үҙ фекере менән уртаҡлашҡан гәзит уҡыусыбыҙ бына нимә яҙа: "Бик етди мәсьәлә күтәрәһегеҙ. "Хужа" ауыҙына ҡарап ултырыр көндәр килде, үкенескә ҡаршы. Оло йәштәгеләр өсөн генә түгел, йәштәр өсөн дә был оло проблема. Бөгөн "ҡулайлаштырыу" тигән булып, йәштәрҙе эш урынынан ҡыуалап маташыусылар күбәйҙе. Күптән түгел генә ошо сәбәптән 12 йыл эшләгән ерҙән китергә мәжбүр булдым. Ә минең урынымда был хеҙмәт тураһында бер нәмә лә аңламаған пенсионер ултырып ҡалды, сөнки ул "хужа"ның бик яҡшы танышы… Ә бит яҡлау эҙләп бер ҡайҙа ла мөрәжәғәт итерлек түгел. Ҡул ҡулды йыуа…" Беҙ иһә "Ҡунаҡбикә"не күңел төшөнкөлөгөнә бирелмәҫкә саҡырабыҙ. "Башҡортостан" гәзите ауыр саҡта ярҙам ҡулы һуҙырға әҙер. "Юрист кәңәштәре", "Халыҡ тауышы", "Хат юлға саҡыра" рубрикалары тап халыҡ мәнфәғәтен ҡайғырта.
Салауат Юлаев исемендәге дәүләт премияһы лауреаты Ринат Камалдың Рафаэль Аҙнағолов тураһындағы "Ырымбурҙың ырыҫлы улы" тигән яҙмаһы ла гәзит уҡыусыларыбыҙҙа ҙур ҡыҙыҡһыныу тыуҙырған. Мәҡәлә аҫтындағы ике фекерҙе лә һеҙҙең иғтибарға тәҡдим итәбеҙ: "Күп яҡлы талант эйәһе Рафаэль Аҙнағолов! Яҙмаларын уҡып барам. Уның ише төплө мәҡәлә, фәнни эш яҙыусы педагогтар, ғөмүмән, һирәк. Рәхмәт!", "Күренекле башҡорт яҙыусыһы Ринат Камал Рафаэль ағай хаҡында ҡайһылай матур яҙа! Рафаэль Аҙнағолов — милли телебеҙҙе һәм мәҙәниәтебеҙҙе һаҡлаусы педагог-ғалим! Уның хеҙмәттәре, матбуғатта йыш күренгән яҙмалары беҙҙең өсөн, уҡытыусылар һәм ғалимдар өсөн иҫ киткес бай, ғәжәйеп тәрән аҡыллы сығанаҡ ул. Шундай олуғ башҡорт шәхесе тураһында йылы һүҙҙәре өсөн Ринат тиңдәшкә рәхмәт!" – тигәндәр.
Гәзит биттәрендә урман мәсьәләһенә ҡағылған материалдар йыш сыға. Шуларҙың береһе бәләкәй генә мәғлүмәттә Ҡыйғы район судының 336 төп ҡайынды законһыҙ киҫкән ғәйепләнеүсегә 1,3 миллион һумды ҡайтарыу тураһында ҡарар сығарылғанлығы тураһында бәйән ителә. "Р. Барал" тигән исем аҫтында үҙ фекерен белдергән гәзит уҡыусыбыҙ был хаҡта бына нимә яҙа: "Ауыл кешеһе миллион ярым һум аҡсаны ҡайҙан алһын?! Ни өсөн суд шундай рәхимһеҙ? Бөрйән, Белорет, Йылайыр, Учалы райондарында, миңә мәғлүм булыуынса, ҡайһы бер түрәләрҙең "ҡыйыҡ" аҫтынан меңәрләгән кубометр иң ҡиммәтле ағастар "һул"ға оса. Ниңә шул мутлашыусыларҙы тотоп судҡа бирмәйҙәр? Ә бер ябай ауыл кешеһен "һә” тигәнсә тотоп, миллионлаған штраф һалып та ҡуялар! Ул ниндәй ҡиммәтле ҡайындарҙы ҡырҡҡан икән? Ә стратегик урмандарҙы юҡ итеүселәр рәхәтләнеп йәшәй! Эйе, ғәҙеллек юҡ, Алла бар! Оятығыҙ юҡ һеҙҙең, чиновниктар!"
Законһыҙ урман ҡырҡыусыларға ҡаршы көрәш бара. Судтың ҡарарын инҡар итә алмайбыҙ. Шулай ҙа ғәҙелһеҙлектең шаһиты булған саҡта был турала мәҡәлә яҙыу мотлаҡ, әлбиттә.