Башҡортостан төҙөүселәре һөнәри оҫталыҡта ярышты

– Һорауҙарығыҙ менән ҡамасаулап йөрөмәгеҙ әле, әллә берәйһе юрамал ебәрҙеме? – тине шаярыу ҡатыш Лидиә Әхмәтйәнова. Ысынлап та, һәр минуттары ҡәҙерле шул: ул хеҙмәттәше Нина Сапаева менән Нефтекама ҡалаһынан "Башҡортостандың төҙөлөш комплексының иң яҡшы плитә һалыусыһы" конкурсында ҡатнаша. Ә хәбәр һатып торһаң, артығын ыратып булмаясағы көн кеүек асыҡ.

Төҙөлөш тармағы хеҙмәткәрҙәренең һөнәри оҫталығын асыҡлауға йүнәлтелгән республика конкурсы быйыл етенсе тапҡыр үтә. Уны Башҡортостандың Төҙөүселәр союзы ойоштора. Сараны "Дортрансстрой" икенсе йыл рәттән үҙенең майҙансығында үткәрә. Ойоштороусыларҙың береһе Олег Мәннәнов һөйләүенсә, былтыр иң яҡшы маляр асыҡланһа, быйыл төҙөүселәр "иң яҡшы плитә һалыусы" номинацияһында көс һынаша.
Өфөнөң Сипайлово биҫтәһендә үткән был сарала йәмғеһе 15 төҙөлөш ойошмаһы вәкиле ҡатнашырға тейеш булһа, шуның ни бары туғыҙы килеп етә алған. Улар араһында Өфө, Салауат, Туймазы, Нефтекама ҡалалары төҙөүселәре бар, ә бына ҡайһы берәүҙәр бихисап сәбәп арҡаһында юлға сыға алмаған. Ойоштороусыларҙың тел төбөнән шул аңлашылды: йәй – төҙөлөш айырыуса ҡыҙған осор, ҡайһы берәүҙәргә үҙ мәлендә заказсыға эшен тапшырырға кәрәк, ә кемгәлер аҡса булмауы ҡамасаулаған.
Әлбиттә, бында килгән һәр оҫта тик еңеүгә өмөт итә. Еңеүсене эшенең тиҙлеге (ике сәғәт ярым ваҡыт бирелә), уның сифаты, шулай уҡ үҙ һөнәренең теоретик нигеҙен белеү кимәленән сығып баһалайҙар. Шулай уҡ технологиялар ҙа күҙ уңынан ысҡындырылмай. Әлбиттә, бындағы һәр төҙөүсе үҙ оҫталығынан, үҙ тәжрибәһенән сығып эш итә, ҡорамалдары ла бер-береһенекенән шаҡтай айырыла: берәүҙәр плитәне электр ҡырҡҡыс менән бысһа, икенселәр яңы алымға өҫтөнлөк бирә – лазер ҡуллана.
Конкурстың жюри ағзаһы (етенсе йыл инде!), Башҡорт архитектура-төҙөлөш колледжы уҡытыусыһы Валентина Молоканова әйтеүенсә, һалынған плитә араһында бер ниндәй бушлыҡ ҡалырға тейеш түгел, шулай уҡ иҙмәләрҙең сифаты ла ентекләп тикшерелә. Мәҫәлән, ярыш барышында уҡ белгес ҡайһы берәүҙәрҙең эш сифатын түбән баһалаһа, башҡаларыныҡын ҡәнәғәтләнерлек тип тапты.
Ә бына яңы таныштарыбыҙ, "Нефтекамскстройзаказчик" предприятиеһы оҫталары Лидиә Әхмәтйәнова менән Нина Сапаева иң һөҙөмтәле өсәү рәтендә ине. Күҙҙәренә ҡул эйәрмәй, ярты стенаны плитә менән ҡаплап та ҡуйғандар. Шулай булмай ни, был тармаҡта тиҫтә йылдан ашыу эшләйҙәр бит. "Эшебеҙҙән ҡәнәғәтбеҙ: лайыҡлы хеҙмәт хаҡы алабыҙ, кешеләр өсөн йәм һәм матурлыҡ булдырабыҙ", – ти улар. Конкурста беренсе тапҡыр ғына ҡатнашыуҙарына ҡарамаҫтан, яҡшы һөҙөмтәгә өмөтләнә улар. Ә беҙҙең өсөн бындағы һәр оҫта еңеүсе – үҙ эшен бөтә күңелен һалып башҡарған, тирә-яғыбыҙҙы матурыраҡ итеү өсөн көсөн йәлләмәгән һәр кем был исемгә лайыҡтыр. Моғайын, конкурсты ойоштороусылар ҙа ошоно иҫтә тотоп эш иткәндер.