Мәләүез механика-технология техникумы әҙерләгән белгестәрҙе ойошмалар ҡуш ҡуллап эшкә ала, сөнки бына инде 50 йылдан ашыу баҙар иҡтисады шарттарында ла әһәмиәте юғалмаған кадрҙар әҙерләнә. Барлығы 1235-кә яҡын студент техникумдың иҡтисад, төҙөлөш, механика, технология бүлектәрендә белем ала.

Бында уҡыу һәм көнкүреш өсөн уңайлы шарттар бар. Бер нисә корпустан торған техникумда кәрәкле йыһаз, заманса техникалы уҡыу кабинеттары, оҫтахана, ике спорт, шулай уҡ тренажер, акт залдары, хатта музей ҙа бар. Һуңғы йылдарҙа компьютерҙар, спорт йыһаздары, телевизор һәм видеомагнитофондар, башҡа техник кәрәк-яраҡ алынған. Ситтән килеп уҡыусылар өсөн ике ятаҡта (егеттәр һәм ҡыҙҙар өсөн айырым) һәйбәт мөмкинлектәр тыуҙырылған, унда ял, уҡыу бүлмәләре лә бар.
Техникум 70 меңдән ашыу китабы булған бай китапханаһы менән дә ғорурлана. Бында йөҙләгән гәзит һәм журнал яҙҙырыла, уларҙың барыһы ла студенттар ҡарамағында.
Һөнәри белемде нығытыу өсөн төрлө факультатив эштәр, түңәрәктәр ҙә ойошторола. Шулай уҡ ижади яҡтан үҫеш өсөн йыр, бейеү ансамблдәре, театр, ҡурай, гармун һ.б. түңәрәктәр уңышлы эшләй, йәнең теләгәненә барып шөғөллән, һәләтеңде үҫтер.
Техникумда спортҡа ҙур иғтибар бүләләр. Спорттың 15 төрө буйынса секциялар эшләй һәм студенттар йыл һайын ҡала, республика ярыштарында лайыҡлы урындар яулай. Ғөмүмән, Мәләүез механика-технология техникумы үҙ студенттарының һәр яҡлап үҫеше өсөн тырыша.
Техникумда белем һәм рухи көс алған студенттар оло тормош юлына ныҡлы әҙерлек менән килә, үҙ урынын табыуға өлгәшә. Һәр ерҙә уңыш, ҡаҙаныштар нигеҙен етәксе һала, уның ойоштороу һәләте, кешеләргә мөнәсәбәте коллективтың эшмәкәрлегенә ыңғай йоғонто яһай. Мәләүез механика-технология техникумы директоры, Рәсәй Федерацияһының почетлы урта һөнәри белем биреү хеҙмәткәре Хәмит Рәшит улы Ҡунаҡҡоловтың хеҙмәте баһалап бөткөһөҙ. Уның етәкселегендә коллектив агросәнәғәт тармағы өсөн кадрҙар әҙерләүҙең яңы алымдарын тормошҡа ашыра. Техникумды тамамлаған йәш белгестәр Мәләүез ҡалаһы һәм районында ғына түгел, республика, Рәсәй төбәктәрендә лә тарала. Мәҫәлән, В.Кирсанова — Белорет һөт заводында цех начальнигы, В. Саглаев — "Мәләүез шәкәр заводы" асыҡ акционерҙар йәмғиәтенең баш инженеры.
Студенттарҙың практика үтеүе лә алдан уйлап ойошторола. Улар "Өфөмолагропром", Мәләүез шәкәр заводы, "Һыра заводы", Мәләүез төҙөлөш компанияһы, "Вимм-Билль-Данн"дың филиалы — Стәрлетамаҡ һөт заводы, Мәләүез һөт-консерва комбинаты кеүек ҙур ойошмаларҙа белемен камиллаштыра, эшкә өйрәнә, артабан шунда эшкә ҡала.
Техникум студенттар юғары белем алһын өсөн Башҡорт дәүләт аграр университеты, Мәскәү дәүләт технология һәм идара итеү университеты менән килешеүҙәр төҙөгән. Ғөмүмән, Мәләүез техникумына уҡырға килгән балалар ышаныслы ҡулдарға эләгә. Уларҙың киләсәк тормошо өсөн борсолмаҫҡа тулы нигеҙ бар.