Ике аҙнанан “Халыҡ күҙе” конкурсының сираттағы арауыҡ этабында еңеүсенең исеме асыҡланасаҡ. Конкурс “Берҙәм Рәсәй”ҙең төбәк бүлексәһе тарафынан партияның “Имен юлдар” проектына ярашлы иғлан ителгәйне. Еңеүсе “Бәйләнештә” сайтындағы партияның рәсми битендә тауыш биреү йомғаҡтары буйынса билдәләнә.
Бөтә республиканан тиҫтәләгән автоһәүәҫкәр бәйгелә ҡатнашырға теләк белдерҙе. Бының өсөн konkurser@mail.ru адресына, “Халыҡ күҙе” тигән билдә ҡуйып, юл ҡағиҙәһен боҙоу тураһындағы видеояҙма ебәрергә, бәйләнеш өсөн мәғлүмәттәреңде күрһәтергә кәрәк. Видеоматериалдар сара күреү өсөн Башҡортостан буйынса ЮХХДИ идаралығына тапшырыла.
Әйткәндәй, бәйгегә июль башында арауыҡ йомғағы яһалғайны инде. Унда Өфөнән Ренат Нурешев еңде. Тап уның видеояҙмаһы иң күп тауыш йыйҙы. Әммә Ренат бының менән генә туҡтап ҡалырға йыйынмай. Юл ҡағиҙәләрен боҙоусылар уның автотеркәгесе объективына йыш эләгә.
Республикала бәлиғ булған һәр кеше конкурста ҡатнаша ала. Арауыҡ йомғағы ай һайын яһала. Йыл аҙағында бәйгенең төп еңеүселәре асыҡланасаҡ.