Ҡуян йылы тарих биттәренә инеп йәшеренеүгә һанаулы ғына көндәр ҡалды. Алыҫта Аждаһа йылының ажғырып килеүе һиҙелгәндәй. Японияла һәм башҡа Көнсығыш илдәрендә ҡабул ителгән календарға ярашлы, 12 йыллыҡ йыл иҫәбе (мөсәл) йыл һайын ҡайһы ла булһа хайуан билдәһе менән үтә. Кеше яҙмышы ла үҙе тыуған йыл үҙенсәлектәре менән тығыҙ бәйле, ти боронғолар. Көнсығышта бындай календарь ҙур танылыу яуланы. Тыуған йылын, көнөн аныҡ белгәндәр йондоҙнамә ярҙамында үҙенә ярашлы тормош иптәшен һайлай, яңылыш аҙымдарҙан ҡурсалана ала.
2012 йыл беҙгә әкиәттәрҙән яҡшы таныш персонаж — Аждаһа билдәһе менән үтәсәк. Тышҡы ҡиәфәтенән уҫаллыҡ, ҡеүәт, көс, һығылмалылыҡ, ғәйрәт бөркөлөп торған хайуан менән нисек дуҫлашырға, йылды имен-аман үткәреү өсөн уның ниндәй ҡылыҡтарына күҙҙе йомоп, ҡайһыларына нығыраҡ иғтибар итергә? Әйҙәгеҙ, ошо йылда тыуған “аждаһа”ларҙың холоҡ-фиғеле, шөғөлдәре, йәшәү рәүеше менән танышайыҡ.
* * *
Аждаһа йылында тыуған кешеләрҙең сәләмәтлегенә көнләшерлек, дәрт-дарманы ташып тора, ҡуҙғыусандар, тиҫкәрелек һәм ҡырҡыулыҡтан да азат түгелдәр.
Намыҫлы, хис-тойғоға бай, ҡыйыу шәхестәр, улар менән “разведка”ға барырға мөмкин. Ихтыяр көсө менән башҡаларҙан айырылып торалар. Асыҡтан-асыҡ фекерен белдерергә һәләтлеләр. Кешенән бурысҡа аҡса һорарға, телмәр тоторға яратмайҙар. Хаталарын, яңылыш аҙымдарын тиҙ генә төҙәтә алалар. Бик иртә кейәүгә сығалар йәки өйләнәләр. Бөтөнләй ғаилә ҡормауҙары ла ихтимал. Ғүмер буйы үҙҙәрен яратыуҙы тойоп йәшәйҙәр.
Икейөҙлөлөк, ваҡсыллыҡ уға хас булмаһа ла, Сусҡа кеүек бер ҡатлы, ышаныусан тип тә әйтеп булмай үҙен. Камиллашыуға ынтылыш уны башҡаларға ҡарата ла талапсан итә. Йыш ҡына әсе теленә хужа була белмәй, уйлап еткергәнсе әйтеп өлгөрә, әммә уның кәңәштәренә ҡолаҡ һалыу бик файҙалы. Ғорур, төрлө яҡлап үҫешкән, һәләтле, сыҙам, йомарт Аждаһа менән әшнә булырға теләүселәр ифрат күп. Ул ғүмер буйы бер нәмәгә лә мохтажлыҡ кисермәйәсәк, сөнки һәр эштә уға уңыш юлдаш. Артисмы, табипмы, сәйәсмәнме — ул гелән түрҙә, хөрмәттә. Ниндәй генә бөйөк эшкә үҙен бағышламаһын, һәр саҡ маҡсатына ирешер. Әммә ошондай уҡ уңыш менән тыйылған, ҡырын эштә лә еңеп сығырға мөмкин, сөнки ул — еңеүсе!
Үҙен яратыусылар ифрат күп булһа ла, һөйөү хистәрен түгеп-сәсеп йөрөүселәрҙән түгел. Был билдәгә ҡараған ҡатын-ҡыҙ ир-ат тарафынан айырыуса ҙур иғтибар менән солғана. Буйҙаҡлыҡтың тәмен улар яҡшы белә, яңғыҙлыҡты һис тә бәхетһеҙлек тип ҡабул итмәй.
Тормош юлын Сысҡан менән парлашып үтеүе ихтимал. Аҡыллы Йылан да уның бар кәмселектәрен ҡабул итә белер. Тәкәббер, һөрән һалыусы Әтәс тә Аждаһа менән уртаҡ тел табыу маһирлығына эйә. Ул ҙур ҡәнәғәтлек менән “икенсе яртыһы”ның уңыштарын сүпләп кенә торор. Маймыл уны мөхәббәттә лә, эшендә лә хәйләкәрлеге, күркәм сифаттары менән байытыр, тулыландырыр. Ә Аждаһа, үҙ сиратында, көс-ғәйрәте менән бүлешер. Маймылдың һәр эште көлкөгә бороуы, ҡыҙыҡлы һүҙҙәре менән албырғатыуы хатта үҙен ҡеүәтле, һынмаҫ һанаған хайуандың да ғорурлығын йомшартырлыҡ. Юлбарыҫ менән тыныс тормош килеп сыҡмаҫ, айырыуса Эттән арыраҡ тороу яҡшы.
Ғүмеренең тәүге өлөшөндә ул ҡыйынлыҡтар кисерәсәк, сөнки яҡындарынан күпте өмөт итеп, талаптарҙы арттырасаҡ. Ни тиклем юҡҡа-барға көйөнмәй йәшәһә, шул тиклем тормошо алға барасаҡ. Даими ҡәнәғәтһеҙлек кисереүҙән ул ғүмер буйы яфалана, холоҡһоҙлоғо ла шуға бәйле. Өлкәнәйгән осорҙа унан да бәхетле кешене табыуы мөмкин түгел. Йондоҙнамәнең был билдәһе тормошто һәм үҫеште кәүҙәләндерә. Аждаһа һәр йортҡа дүрт төрлө шатлыҡ алып килә: байлыҡ, изгелек, гармония һәм оҙон ғүмер.