Бала саҡта Яңы йыл байрамын ҡаршылау, мөғжизә көтөү мәлдәре, һөйләп аңлата алмаҫлыҡ һөйөнөстәр, бүләктәр, рәхәтлек тойғолары иҫтә, һаман да иҫтә. Ә хәҙер, өлкәнәйә төшөп, әкиәттәргә ышанмай башлағас, шау-шыулы байрам да беҙҙе артыҡ ҡыҙыҡһындырмай, киреһенсә, күңелдәрҙе һиллек, донъя именлеге, тыныс тормош нығыраҡ тартҡандай.
Бәлки, Яңы йылды кеше йәшәмәгән ниндәйҙер бер утрауҙа, кокостар, маймылдар компанияһында үткәреү юҡһыныу, күңелһеҙләнеү тойғоларын еңергә ярҙам итер ине. Американдар юҡҡа ғына был хәлде байрам алдынан була торған “ауырыу билдәһе” тип атамайҙыр.
Белгестәр әйтеүенсә, Яңы йыл байрамын көткәндә бойоғор, төшөнкөлөккә бирелер, моңһоуланыр өсөн сәбәптәр быуа быуырлыҡ. Мәҫәлән, йыл аҙағында үткәнгә ҡараш ташлап, уңыш һәм уңышһыҙлыҡтарҙы барлай торған мәл етә. Йәнә нимәнелер эшләп еткермәгәнбеҙ, өлгөрмәгәнбеҙ, арттараҡ ҡалғанбыҙ... Ҡайҙа ҡараһаң да — минус, минус, минус... Үҙеңә асыуланмай кемгә асыуланырһың инде.
Бала сағығыҙҙы иҫкә төшөрөгөҙ. Атай-әсәйегеҙ Яңы йыл кисәһенә киткән, ә һеҙҙе, үҙҙәре менән алмай, өләсәйегеҙ эргәһендә ҡалдырған. Ә институтта байрамдың иртәгәһенә имтихандар тапшырырға кәрәккәс, артыҡ күңел асыу ҡайғыһы ла булмағандыр. Ошо хәл-ваҡиғаларҙы беҙ йәнә аңыбыҙҙа яңыртабыҙ, икеләнеү, ҡурҡыу тойғоларынан азат ҡала алмай йонсойбоҙ.
Яңы йыл ығы-зығыһы күптәр өсөн баш ауыртыуы, хәлдән тайҙырғыс стресс менән бер. Мәшәҡәттәрҙе йырып сығыр өсөн күпме көс, ваҡыт кәрәк тип уфтанырға ла тура килә. Күңелләнеү ҡайғыһы юҡ, күптәр иҫке йылда йоҡоно нисек туйҙырырға икән тип баш вата, ял итеү әмәлен эҙләй.
Иң ауыры, моғайын, бүләк һайлауҙыр. Дөйә лә — бүләк, төймә лә — бүләк, тигәнгә ышанмағыҙ. Һәр кемдең күңеленә оҡшаған, һөйөнөс тыуҙырырлыҡ бүләкте эҙләп табыу өсөн аҙ тырышлыҡ һалырға кәрәкмәй. Сығымдарығыҙҙы алдан иҫәпләмәһәгеҙ, бурысҡа батыуығыҙ ҙа ихтимал. Байрам табыны, яңы күлдәк, бүләктәр өсөн аҡса ғаилә бюджетына ауырлыҡ килтермәҫкә тейеш. Ә быныһы үтә лә көсөргәнешле эш.
Иң ҡатмарлы мәсьәләне сисеүҙең дә бер нисә юлы була. Иҫке йылды оҙатҡанда уңыштарҙы барлау күпкә отошлораҡ. Яҡшы, ыңғай уйҙар ғына еңеүгә илтә. Психологтарҙың бер нисә ябай кәңәшен тәҡдим итәбеҙ.
Бөтә байрам мәшәҡәтен үҙ өҫтөгөҙгә алмағыҙ. Яҡшы ойоштороусы була белһәгеҙ, барлыҡ йорт эштәрен йәһәт атҡарыуға өлгәшерһегеҙ. Яңы йыл кисе өсөн яңы идеялар өҫтөндә уйланыу ҡамасауламаҫ. Оливье салатын әҙерләү бер һеҙҙе генә ялҡытмағандыр, әйҙәгеҙ, ят, үҙенсәлекле рецептар, блюдолар эҙләү өҫтөндә ижади эшләйек.
Тирә-яғығыҙға күҙ һалығыҙ. Бәлки, яҡындарығыҙҙың һеҙҙекенә ҡарағанда ла етдиерәк проблемалары барҙыр? Үҙегеҙҙең генә “ҡаҙан”да ҡайнап йәшәүҙең йәме лә, тәме лә юҡ, мохтаждарға ярҙам ҡулы һуҙығыҙ. Тормош дауам итә. Яңы йылда ла!