Башҡортостан Президенты Рөстәм Хәмитов сит ил журналистары менән осрашты. Рәсми булмаған аралашыу “Өфө” аэропортында делегацияның Мәскәүгә осоуы алдынан үтте.
Сит ил журналистары Башҡортостанда аҙнаға яҡын булғайны. “Синь Хуа” мәғлүмәт агентлығы (Ҡытай Халыҡ Республикаһы), “Berliner Zeitung” (Германия), “Le Figaro Magazine” (Франция), “Russia Beyond the Headlines” (Испания) баҫмалары хәбәрселәре Күгәрсен, Көйөргәҙе һәм Бөрйән райондарында туристар үҙ итеп өлгөргән урындар менән танышҡан. Мораҙым тарлауығын, Йомағужа һыу һаҡлағысын күреп өлгөргәндәр, Ағиҙел буйлап кәмәлә йөҙөп төшөп, Шүлгәнташ мәмерйәһе менән танышып сыҡҡандар. Улар урындағы халыҡ менән аралашырға ла мөмкинлек тапҡан – баҡһаң, бөтәһе лә урыҫса һәйбәт белә икән.
Рөстәм Хәмитов ҡунаҡтарҙан тәьҫораттары тураһында һорашты. Уларҙың бөтәһендә лә Башҡортостан тәбиғәтенең хозурлығы яҡшы тәьҫир ҡалдырған.
– Беҙҙең ниндәй матур тәбиғәтле төбәктә йәшәүебеҙҙе үҙегеҙ күрҙегеҙ. Ошо өҫтөнлөгөбөҙҙө туризм индустрияһын үҫтереүҙә ҡулланғы килә. Бының өсөн байтаҡ аҡса, инфраструктура, яңы кемпингтар, биналар, юлдар кәрәк. Бер яҡтан, тәбиғәтебеҙҙә туристар өсөн ял итеү мөмкинлеге булдырырға кәрәк, икенсе яҡтан, уны килер быуындарға имен килеш һаҡлау зарур. Был, әлбиттә, еңел бурыс түгел, – тине Рөстәм Зәки улы.
Туризм мәсьәләләренән тыш халыҡтың ауыл еренән күпләп ҡалаға күсеүе проблемаһы ла күтәрелде. Журналистар Президенттан быны туҡтатыу өсөн ниндәй саралар күрелеүе хаҡында белеште. Рөстәм Хәмитов йәштәргә эш урындарын арттырыусы “500 ферма” программаһы тураһында һөйләне.
Өфөлә үтәсәк халыҡ-ара саммиттарға әҙерлек барышы ла ҡыҙыҡһындырҙы журналистарҙы. Президент әйтеүенсә, был сараларға махсус рәүештә бер нәмә лә төҙөлмәй, ҡайһы бер объекттар яңыртыла ғына. Әле юғары класлы ҡунаҡханаларға ғына ихтыяж ҙур, уларҙың төҙөлөүе беҙгә туристарҙы тағы ла күберәк йәлеп итер тип өмөтләнеүен белдерҙе республика башлығы.