Аҡъярҙағы 110-сы һөнәрселек училищеһы — ауыл хужалығы белгестәрен әҙерләү буйынса алдынғылар рәтен биләгән мәғариф учреждениеһы. Унда бөгөн 300-гә яҡын уҡыусы белем ала. Йәштәрҙең күбеһе юғары уҡыу йортона ынтылыуға ҡарамаҫтан, училищены һайлаусылар кәмемәй.
Бында мәктәптәрҙе ҡулайлаштырыуҙың да өлөшө бар: байтаҡ йәштәр IX класты тамамлағас та һөнәри белем алырға ҡарар итә. Бында ауыл өсөн квалификациялы белгестәр — “ВСДЕҒ” категориялы тракторсы-машинист, “ВСДЕ” категориялы водитель, иретеп йәбештереүсе, ташсы, төҙөүсе, тегенсе, һатыусы, контролер-кассир, умартасылар әҙерләйҙәр. Шулай уҡ ҡайһы бер һөнәрҙәр буйынса түләүле киске курстар ойошторолған. Училищела, эш биреүсе ойошмаларҙың талаптары күҙ уңында тотолоп, заман технологиялары киң ҡулланыла, уҡыу-уҡытыу программаһына яңылыҡтар даими индерелә, өҫтәмә белем биреү саралары күрелә. Мәҫәлән, 2012/13 уҡыу йылында “Урал аръяғы” МТС-ының һорауы буйынса сит илдәрҙең заманса техникаларында эшләү өсөн “Ғ” һәм “D” категориялы яңы кимәлдәге механизаторҙар әҙерләнгән. Бындай танытма 35 кешегә тапшырылған. Белем усағының ике ҡатлы бинаһында 20-гә яҡын уҡыу һәм алты лаборатория кабинеты эшләй. Студенттарҙың үҫешендә бай китапхананың да өлөшө ҙур. Унда 16 меңдән ашыу фәнни һәм әҙәби әсбап тупланған, иркен, яҡты уҡыу залы бар. Төрлө райондан, Ырымбур, Силәбе өлкәһенән килгән уҡыусыларға дөйөм ятаҡтан урын бирелә. Өс ҡатлы 128 урынға иҫәпләнгән йортта йәшәү, белемде арттырыу, рухи үҫеш өсөн барлыҡ шарттар тыуҙырылған. Аҙна һайын төрлө кисә, мәҙәни һәм тәрбиәүи саралар уҙғарыла. Иркен спорт, тамаша залдары бер ваҡытта ла буш тормай. Ашханала көнөнә дүрт тапҡыр бушлай туҡланыу ойошторола. Уҡытыу-етештереү кимәлен күтәреү маҡсатында училище йыл да яңы техника менән тулыландырыла. Әле унда тиҫтәгә яҡын еңел һәм йөк машинаһы, автобус, трактор, комбайндар бар. Техникала йөрөп өйрәнеү өсөн иркен майҙансыҡ булдырылған. Студенттар практиканы училищеның баҫыуҙарында үтә. Сәсеү, уңыш йыйыу эштәрен дә үҙҙәре башҡара. Улар шулай уҡ “Урал аръяғы” МТС-ында, райондың ауыл хужалығы һәм юл төҙөү ойошмаларында, шәхси фермер хужалыҡтарында алған һөнәрен камиллаштыра ала. Бында умартасылыҡҡа ла иғтибар ҙур. “2011 — 2015 йылдарҙа көньяҡ-көнсығыш төбәкте иҡтисади яҡтан үҫтереү” комплекслы программаһына ярашлы, училищела ҡортсолоҡ үҙәге булдырылып, унда әлегә ҡәҙәр ете меңдән ашыу белгес әҙерләнгән. Директор Хәлил Ибраһимов уҡыу йортоноң һәйбәт эш һөҙөмтәләрен, юғары күрһәткестәрен коллективтың уртаҡ хеҙмәт емеше тип баһалай. Бында оҙаҡ йылдар белем биргән тәжрибәле уҡытыусыларҙы, мастерҙарҙы — Варис Миңлешев, Лидиә Ғарифуллина, Нәүфәл Ибраһимов, Ирина Сәлимова, Илһам Юлдашбаевты — телгә алып китмәү мөмкин түгел.


Уҡыу йортонда 20 йылдан ашыу ауыл хужалығы машиналары буйынса дәрес алып барған Нәүфәл Ибраһимов эшенән йәм табып йәшәй. Атайҙарса хәстәрлекле, һөнәрен биш бармағы кеүек белгән педагогтың техникаға һөйөүе уҡыусыларына ла күскән: ниндәйҙер деталде йыйһындармы, йә булмаһа, һүтеп, ҡайтанан ҡорһондармы — йәштәр өсөн барыһы ла ифрат мауыҡтырғыс. Нәүфәл Фәрит улында практика үтеүҙе күптәр түҙемһеҙләнеп көтөп ала. Яҙғы сәсеү, көҙгө уңышты йыйыу эшен остаздары менән бергә, уның ныҡлы күҙәтеүе аҫтында башҡарыу — үҙе ҙур мәртәбә.

“Йәштәрҙе спортҡа, сәләмәт тормошҡа йәлеп итеү, буш ваҡыттарын файҙалы үткәреү йәһәтенән маҡсатлы эш алып барыла”, — ти физик тәрбиә буйынса етәксе Виталий Попов. Үҙҙәрендә күркәм йолаға әйләнгән сараларҙан тыш, уҡыусылар республика, төбәк-ара бәйгеләрҙә лә уңышлы сығыш яһай. Мәҫәлән, күптән түгел Учалы ҡалаһында өҫтәл теннисы буйынса уҙған ярышта училищеның командаһы ll урынға сыҡһа, Зәбир Рәхмәтуллин шәхси беренселектә икенсе баҫҡысты яулаған. Башҡортостандың башланғыс һөнәри белем биреүсе уҡыу йорттары араһындағы баскетбол ярышында ла училище командаһы Урал аръяғы зонаһы буйынса ll урынға лайыҡ булған. Әбйәлил районында уҙған гер күтәреүселәр бәйгеһендә Нәзиф Аҡбалин, Сергей Охрименко икенсе урынды алып, дөйөм команда өсөнсө баҫҡысҡа күтәрелгән. Мини-футбол буйынса үҙҙәренең уҡыу йортонда ойошторолған зона һәм республика ярыштарында ла алдынғылыҡты бирмәгән 110-сы һөнәрселек училищеһы спортсылары тәүге урынды яулаған.


Районда уҙғарылған “Өлкәндәр өсөн халыҡ университеты” курстарының 110-сы һөнәрселек училищеһында дауам итеүе юҡҡа түгел: заман талаптарына яуап биргән спорт залында һауыҡтырыу-спорт уҡыуҙарын физкультура уҡытыусыһы Һәҙиә Ҡоломбәтова алып бара. — Өлкән йәштәгеләр менән эшләүе айырыуса оҡшаны, — ти ул. — Улар яуаплы, ҡыҙыҡһыныусан. Үҙ-ара кәңәшләшеп, оҡшаған күнекмәләр менән шөғөлләндек. Йәштәрҙән ҡалышмай, сәләмәт тормошто үҙ иткән өлкәндәрҙе үҙ уҡыу йортонда ҡабул итә алыуына училище коллективы ифрат шат.

Кемдәр тиһегеҙме? Әлбиттә, студенттар! Училищела ике йыл элек ошо исем менән аталған КВН командаһы төҙөлгән. Ул егеттәрҙән генә тора. “Дала башҡорттары”, күптән түгел генә барлыҡҡа килеүенә ҡарамаҫтан, үҙен республикала танытып өлгөргән: Күмертау ҡалаһында “Шаяндар һәм тапҡырҙар клубы гвардияһы” марафонының төбәк-ара уйынында — беренсе, Белоретта “Урал аръяғы” клубы ярышында өсөнсө урынды яулаған. Шулай уҡ “Башҡортостан йәштәр лигаһы”нда ҡатнашыу бәхетенә өлгәшкәндәр. Командаға төрлө төркөмдә белем алған студенттар тупланған. Улар – Рауил Сынбулатов, Руслан Фәйзуллин, Рөстәм Туҡбаев, Николай Арясов, Фәнил Булатов һәм Ғәлинур Әминев. “Дала башҡорттары”на артабан да уңышлы эшләргә яҙһын!
Хәйбулла районы.