“Башҡортостан” гәзитенән журналист килеп киткәндән һуң ошо баҫмаға яҙылыу мәсьәләһе буйынса күптәр менән һөйләштем. Ыңғай ҡараш тойола. Гәзиттә беҙҙең турала “Ярҙарҙы яҡынайтыр Яр Саллы” тигән яҙма донъя күргәс, ҡыҙыҡһыныусылар тағы ла артты. “Ярты йылға 685,56 һум беҙҙең өсөн ҡыйбат, бына йома һанына ғына яҙылыр инек”, — тигән кешеләр күберәк. Тик, ҡыҙғанысҡа ҡаршы, ҡаланың почта бүлексәһендә: “31805 индекслы гәзиткә яҙылып булмай”, — тип яуап бирәләр.
Беҙ, йәғни Яр Саллы башҡорттарынан бер төркөм, 10 декабрҙә ҡаланың мәҙәниәт һарайында мәшһүр Фәйзи Ғәскәров исемендәге дәүләт академия халыҡ бейеүҙәре ансамбленең концертын ҡарап, халҡыбыҙ өсөн ғорурлығыбыҙ артып, илһам, дәрт алып ҡайттыҡ. Сара “Төньяҡ амурҙары” бейеүе менән башланды, “Еҙ үксә”, “Ете ҡыҙ”, “Бөрйән ҡыҙҙары” менән дауам итте. Сәнғәт оҫталары башҡа халыҡ бейеүҙәрен дә ҙур оҫталыҡ менән башҡарҙы. Кейемдәрҙең сағыулығын, матурлығын тасуирларға һүҙ етмәҫ кеүек. Күмәк бейеүсе ҡатнашҡан, бай йөкмәткеле, ҡиммәте баһалап бөткөһөҙ тамаша ине был.
Тик, ҡыҙғанысҡа ҡаршы, ошо күркәм сара хаҡында ҡалала йәшәүсе милләттәштәребеҙҙең, яҡташтарыбыҙҙың күбеһе алдан ишетмәгән булып сыҡты. Һуң ғына белеп ҡалып, кассаға шылтыратҡандарға: “Билеттар һатылмай! Әллә була ул концерт, әллә юҡ...” — тип яуап биргәндәр. Концерттан бер көн алда билет алырға килгән тиҫтәгә яҡын кешенең дә: “Ниндәй концерт ти ул? Иҫегеҙ киткән икән”, — тип хәтерен ҡалдырғандар. Касса эргәһендәге белдереүҙәр таҡтаһында ла 10 декабрь көнөнә афишалар бөтөнләй юҡ ине. Телевизорҙан концерттың ҡасан, ҡайҙа булыры асыҡ күрһәтелмәне, ансамбль тураһында белешмә генә булды. Танышым Азат хәҙрәт Шәрипов: “Алабуға ҡалаһындағы афишанан күреп кенә килдем”, — тип әйтеп торҙо. Ҡайтышлай бер ҡатын менән һөйләшеп киттек, ул Аҡтаныш районынан ошо сараға тип махсус килгән булған. “Билеттар арзан, залда оло кешеләр әҙ булды, — тип аптыраны ул. — Башҡорт бейеүҙәрен, ғәҙәттә, төрлө халыҡ вәкилдәре яратып ҡарай ҙа баһа!”
Былтыр Стәрлетамаҡ театры менән дә шундай уҡ хәл булғайны. Башҡа милләт концерттарының афишалары, рекламалары бер ай алдан бөтә ергә эленеп, хатта ялҡытып бөтә, ә башҡорт тамашалары тауыш-тынһыҙ, йәшерен рәүештә үткән кеүек. Йә ветерандарға ғына билет тараталар, йә залға айырым берәй мәктәптән уҡыусыларҙы йыялар.
Яр Саллыла 14 йыл йәшәйем, ошо ваҡыт эсендә атаҡлы бейеү ансамбле бында тәүгә сығыш яһаны. Тағы ҡасан килерҙәре билдәһеҙ. Башҡорт халҡы, шулай уҡ барлыҡ ҡитғаларҙа танылыу яулаған Фәйзи Ғәскәров исемендәге дәүләт академия халыҡ бейеүҙәре ансамбле бындай мөнәсәбәткә лайыҡ түгел.