Бокс буйынса Америка чемпионы, Силәбе өлкәһе башҡорто Хәбир Сөләймәновтың Мексикалағы алышта еңеү яулауын хәбәр иткәйнек инде. Лос-Анджелес ҡалаһында йәшәүсе милләттәшебеҙҙе ҡотлау өсөн уның менән бәйләнешкә сыҡтыҡ.
– Хәбир, профессиональ бокста был нисәнсе еңеүең? Ярыштың әһәмиәте ниндәй?
– Донъя чемпионы исеменә дәғүә итер өсөн боксерҙар рейтингының юғары баҫҡысына етергә тейешһең. Был ун икенсе еңеүем булды, тағы ла дүрт-биш алышта һынатмаҫҡа кәрәк. Ғөмүмән, һабаҡ ала белһәң, һәр ярыш үҙенсә әһәмиәтле.
– Белеүебеҙсә, һигеҙ раундлыҡ алышта дәғүәсең – мексикалы Хорхе Геррероны беренсе раундта уҡ еңдең. Көсөгөҙ тиң түгел инеме әллә?
– Уны көсһөҙ тип әйтмәҫ инем, тәжрибәһе лә ҙур. Мексикала алышҡас, көйөрмәндәре лә зал тулы булды. Шулай ҙа ниңәлер тиҙ биреште.
– Еңеүеңә нимә булышлыҡ итте тип уйлайһың?
– Тренерым менән ике ай көсөргәнешле шөғөлләнеүебеҙ һөҙөмтәһе ул. Икенсе сәбәп бирсәткәләрҙә тип уйлайым. Ҡағиҙә буйынса, уларҙы бәйгенең ойоштороусылары бирә, үҙеңдекен кейергә ярамай. Мексикандарҙыҡы ҡәҙимге бирсәткәләрҙән ике тапҡырға йоҡараҡ булып сыҡты, эсенә губка ла һалмағандар, ҡулға бинт та уратманылар. Былар барыһы ла һуғыуҙы йомшартыр, зыянды кәметер өсөн эшләнергә тейеш ине. Боксерҙарҙың йоҙроғо тос бит инде, шуға майҙанға сыҡҡас та үҙемә һуҡтырмаҫҡа кәрәк тип уйлап ҡуйҙым. Ун ике сәғәт буйы сират еткәнен көтөү ҙә тамам асыуҙы ҡабартҡайны. Дәғүәсем нокаутҡа киткәндә хатта тирләргә лә өлгөрмәгәйнем.
– Яңы йылды нисек ҡаршыларға йыйынаһың?
– Тыуған яҡҡа ҡайтып, атай-әсәйем, туғандар эргәһендә булырмын тип уйлағайным, әммә пландар ҡапыл үҙгәрҙе. Мексикалағы алыштан һуң ғинуарҙа уҙасаҡ икенсе ярышҡа саҡырҙылар, хәҙер бар көстө шунда йүнәлтергә кәрәк. Дөрөҫөн әйткәндә, Яңы йыл, тыуған көн, ниндәйҙер байрам тип әллә ни иҫем китеп бармай, уларҙы бер нисек тә билдәләмәйем. 31 декабрҙә дуҫтарым менән Ҙур Айыу тигән тауға барып, саңғыла шыуырға йыйынам, сөнки башҡа ерҙә ҡар юҡ.
– Хәбир, беҙҙә бер яңылыҡ бар: күптән түгел Башҡортостан Бокс федерацияһына яңы рәйес һайланды. Әле был өлкәлә аныҡ маҡсаттар ҡуйыла, пландар төҙөлә. Республикала боксты үҫтереү буйынса һинең дә тәҡдимдәреңде ишетке килә.
– Үҫмерҙәр һәм йәштәр өсөн күберәк ярыштар үткәрергә, билдәле боксерҙарҙы саҡырырға кәрәк. Егеттәр кумирҙарына ҡарап, уларға оҡшарға тырышасаҡ, дәрте артасаҡ.