"Ҡасан да булһа берәүҙе лә ишеткең килмәһә, шылтырат — өндәшмәҫкә һүҙ бирәм".
Г.Г. Маркес.

Тормошта ауыр мәлдәр йыш була. Яҡындарың аңламаһа, хәлеңде уртаҡлашырҙай, сереңде сисерҙәй кешене ситтән эҙләргә мәжбүрһең, кемдеңдер кәңәшенә, ярҙамына мохтажһың.

Өфөләге "ышаныс телефоны" хеҙмәте тап ошо мәсьәләләрҙе хәл итеүгә йүнәлтелгән. Бер төркөм консультантты — йәше, енесе, инаныуҙары, социаль һәм ғаилә хәле төрлө булған кешеләрҙе — бүтәндәргә ярҙам итеү теләге берләштергән. "Ышаныс телефоны" хеҙмәткәрҙәренә ауыр хәлгә тарыған кешенең проблемалары яҡшы таныш. Был ойошмала хәлеңде уртаҡлашырға, ярҙам күрһәтергә, һөйләшергә һәр саҡ әҙерҙәр, мәсьәләләрҙе ҙурға, бәләкәйгә бүлеп ҡарамайҙар. Көсһөҙҙәр генә "ышаныс телефоны" хеҙмәтенән файҙалана тип ярҙам һорарға уңайһыҙланыу урынһыҙ. Барыбыҙға ла йыш ҡына терәк, таяныс кәрәк.
Хеҙмәттең маҡсаты — юғалып, баҙап ҡалмаҫҡа өйрәтеү, үҙ-үҙеңә ышаныс тәрбиәләү. Консультанттар яңғыҙлыҡ, туғандарың менән аралашыу, юғалтыу ҡайғыһын кисереү, ғаиләлә балаға тәрбиә биреү мәсьәләләрен яйға һалыуҙа булышлыҡ итәсәк. Өфөләге психологик күнекмәләр, программалар тураһында мәғлүмәт кәрәкһә, рәхим итеп шылтыратығыҙ.
Бында бәхетле булырға өйрәтмәйҙәр, ауыр хәлгә тарығандарға кәңәш бирмәйҙәр. Белгес һеҙгә проблеманың айышына төшөнөргә, уға төрлө күҙлектән ҡарарға ярҙам итәсәк, сөнки ихтыяжығыҙҙы һеҙҙән дә яҡшыраҡ белгән, тойған кеше юҡ бит. Тимәк, теге йәки был ғәмәлде лә үҙегеҙ һайларға тейешһегеҙ.
Алға киткән сит илдәрҙән айырмалы, Рәсәйҙә ғаиләлә йәбер-золом мәсьәләһенә иғтибар аҙ. Статистика һәм юриспруденция мәғлүмәттәренә ҡарағанда, йәмғиәт был социаль мәсьәләне ситкә этәреүен дауам итә. Рәнйетелгәндәр үҙ ҡайғы-хәсрәте менән яңғыҙ ҡала, кәңәш, ярҙам һорар кешеһе юҡ. "Ышаныс телефоны" барлыҡҡа килеү менән хәл ыңғай яҡҡа үҙгәрер, тигән өмөттәбеҙ.
Һуңғы йылдарҙа балалар араһында үҙ-үҙенә ҡул һалыусыларҙың артыуы борсоуға һала. Ҡыҙғанысҡа ҡаршы, республикабыҙ был күрһәткес буйынса Рәсәйҙә беренсе урынды биләй. Мәсьәләгә ҡағылышлы фекер алышыуҙар нигеҙҙә ғәйеплене асыҡлауға ғына ҡайтып ҡала. Ә бит проблема тәрәндәрәк. Беҙ, ололар, йыш ҡына баланың хәлен, уның яңғыҙлығын, эргәһендә серен асырҙай кешенең булмауын аңлап етмәйбеҙ. Аралашыу ғәмәлдә уй-кисереш менән уртаҡлашыуға түгел, ә "тейеш һәм тейеш түгел" тигән һүҙҙәр менән сикләнә. Беҙ, ғәҙәттәгесә, унан яҡшы уҡыуын, эсмәү-тартмауын, тәртипле булыуын талап итәбеҙ. Һөҙөмтәлә бала ата-әсә талаптарының ҡолона әүерелә. Уға был яуаплылыҡ баҫымын күтәреүе бик ауыр.
Ике йыл элек илебеҙҙә, ниһайәт, балалар һәм үҫмерҙәр өсөн берҙәм ышаныс телефоны ғәмәлгә инде (8-800-2000-122). Сабыйҙарҙы йәберләүҙән һаҡлау кампанияһына ярашлы, ошо телефон һандары федераль каналдарҙан бик ашығыс күрһәтелде. Уның кемдеңдер хәтерендә ҡалыуы ла икеле. Шуға күрә гәзит уҡыусыларға үҙебеҙҙең "ышаныс телефоны"н башҡаларға еткереүҙә ҡатнашырға тәҡдим итәбеҙ. Бер ай дауамында 8 (347) 2516-111 телефоны һандарын гәзиттә баҫтырып сығарырға, үҙәк каналдарҙағы яңылыҡтар тапшырыуында юлаҡ итеп бирергә мөмкин. Кино билетында, мәктәп көндәлеге битендә, һөт тышлыҡтарында ла сағылыш таба ала ул. Ата-әсәләр йыйылышында һөйләшеп, яҡындағы типографияла "ышаныс телефоны" күрһәтелгән наклейкалар баҫтырып, балағыҙ уҡыған мәктәптә таратыу ҙа отошло буласаҡ. Был һандарҙы ҡыҙығыҙҙың йәки улығыҙҙың кеҫә телефонына теркәп ҡуйырға онотмағыҙ.
"Ышаныс телефоны"на шылтыратҡандарҙың барыһына ла аноним аралашыу, серҙе һаҡлау гарантиялана. "Төрлө хәлдән ҡотолоу юлы бар! Был донъяла һин яңғыҙ түгел!" "Ышаныс телефоны": 8 (347) 2516-111.