Бөгөн В.И. Ленин исемендәге Бөтә Союз пионер ойошмаһының барлыҡҡа килеүенә — 91 йыл. Был көн урта һәм өлкән быуын өсөн айырыуса ҡәҙерле. Ҙур ҡаҙаныштары өсөн ике тапҡыр Ленин ордены менән бүләкләнгән ойошмала миллиондарса уҡыусы тәрбиә мәктәбен үтте. Иҫтәлекле көн уңайынан гәзит уҡыусыларға “Пионерҙар хәрәкәтен нисек баһалайһығыҙ, ул бөгөн кәрәкме?” тигән һорау менән мөрәжәғәт иттек.

Вазифа СӘҒӘҘӘТОВА, уҡытыусы, Баймаҡ районы:
— Пионер булған сағым шул тиклем һағындыра: слеттар, отряд йыйындары, төнгө усаҡ, ҡыҙыл байраҡ, галстук, ант биреүҙәр... Әле Әбделкәрим мәктәбе уҡыусылары күңеленә үҙебеҙҙәге ошо рухты һалырға тырышабыҙ. Унда “Нурбостан республикаһы” исемле ойошма эшләй. Йыл да сентябрҙә V класс уҡыусыларын тантаналы шарттарҙа пионерға алабыҙ. Ант бирәләр, галстуктары ла бар. 19 майҙа бергәләп турслетҡа сығабыҙ.
Таһир ҠУНАҠБАЕВ, эшсе, Өфө ҡалаһы:
— Пионерия тураһында насар һүҙ әйтеү мөмкин түгел. Ул йәш быуынды берҙәм, тәртипле, йыйнаҡ, яуаплы, эшһөйәр, маҡсатлы булырға өйрәтте. Әле ҡала урамында ни эшләргә белмәй шашынып, уңға-һулға бәргеләнеп йөрөгән үҫмерҙәргә ҡарайым да йөрәгем әрней: пионерияны бөтөрөү бына ниндәй хәлгә килтерҙе!
Гүзәлиә ХӘЛФЕТДИНОВА, хужабикә, Әбйәлил районы:
— Минеңсә, бөгөнгө уҡыусыларҙы дингә яҡынайтырға кәрәк. Сағыштырып ҡарап, совет осорондағы идея уның әхлаҡи нигеҙҙәренән алынған, тип әйтә алам. Кешегә алға ҙур маҡсаттар ҡороп, ышаныс, өмөт менән йәшәү өсөн ниндәйҙер рухи терәк кәрәк, һәм бөгөн ул — дин.
Инсаф МОРАТОВ, Хәйбулла районы:
— Октябрят, пионер, комсомол, коммунист — тормошта ошо баҫҡыстарҙы үтеү кешенең шәхес булараҡ үҫешендә ҙур әһәмиәткә эйә булған. Иң мөһиме — ул йәмғиәттәге урынын белгән һәм, алда юғарыраҡ үр көтөүен ныҡлы белеп, шуға табан ышаныслы атлаған. Бөгөн, ошондай баҫҡыстар булмағанлыҡтан, тарҡаулыҡ барлыҡҡа килде, өлкәндәрҙе ололау, йәштәрҙе һанлау кеүек талаптар юғала бара. Ошондай ҡиммәттәребеҙ бөтөнләй юҡҡа сыҡмаһын өсөн тәү сиратта мәктәптә даими эш алып барыу мөһим. Пионерияны тергеҙеү мотлаҡ, тип уйлайым. Әлбиттә, ул элеккенең күсермәһе була алмай, әммә төп идеялар һаҡланырға тейеш.
Азамат СӘЙФИЕВ, Белорет ҡалаһы:
— Рәсәйҙә һәр ваҡыт шулай: берәй нәмәне бөтөрәбеҙ ҙә йылдар үтеү менән ҡайтанан тергеҙәбеҙ. Пионерия кеүек ҙур тәрбиәүи көскә эйә ойошманың да кире аяҡҡа баҫырына шикләнмәйем.