“Башҡортостан” гәзите журналистары “любизар”ҙар менән 200 төп шыршы ултыртты

Иртәнсәктән редакция гөрләй: бер төркөм журналист Ишембай тарафына командировкаға сығып китте, икенсе төркөм Өфө районының Шамонин ауылына ағас ултыртырға барырға йыйына. “Көрәк-биҙрәләрегеҙҙе алығыҙ ҙа машинаға сығып ултырығыҙ! Юлға!” – тип ашыҡтырҙы Венер Исхаҡов. “Һә” тигәнсе тәғәйен ауылдағы мәктәпкә барып та еттек.

Редакцияны был белем усағы менән күптәнге дуҫлыҡ ептәре бәйләй. Уға нигеҙ һалынғас та гәзит биттәрендә төҙөлөш барышын даими яҡтырттыҡ. Бына инде мәктәп ишеге асылыуға ла өс йыл үтеп киткән. Әле бында 300-ҙән ашыу бала белем ала. Мәктәп директоры Рәшиҙә Мостафинаның башланғысын хуплап, уҡытыусылар коллективы “Башҡортостан” гәзитенә яҙылыуға ла ихлас ҡушылғайны. Шуға ла “Любизар” 1-се башҡорт атлы полкы” хәрби-тарихи реконструкция клубы етәксеһе Илдар Шәйәхмәтов редакция менән берлектә Шамонин мәктәбе биләмәһендә ағас ултыртыу тәҡдимен еткергәс, ҡуш ҡуллап риза булдыҡ. “Үҙ йортом” республика программаһының уңайлы шарттарын файҙаланып, әлеге ауылда тиҫтәнән ашыу хеҙмәттәшебеҙ төпләнде. Беҙҙең редакцияла ғына түгел, бүтән киң мәғлүмәт сараларында эшләүселәр ҙә байтаҡ бында. Уларҙың балаларының күбеһе — Шамонин мәктәбе уҡыусылары. “Любизар” клубы ағзаларының араһында ла “шамониндар” бар.
Яңы ауылдың ҡыуаныстары ла, көйөнөстәре лә етерлек, уны йәмләндереү өсөн күп көс һалырға кәрәк әле. Шуға ла эште мәктәптән башлау бик дөрөҫ. Балалар ҙа, өлкәндәрҙең тырышлығын күреп, үҙ ҡулдары менән ултыртҡан ағастарҙы тәрбиәләп, тирә-яҡ мөхиткә һаҡсыл ҡарашта булырға өйрәнәсәк.
“Любизар” тигән аллеяға нигеҙ һалыу күңелле сараға әйләнде. Балалар бик ихлас ҡатнашты, үҙҙәре ултыртҡан үҫентеләрҙе билдәләп ҡуйып, һуңынан тәрбиәләп торорға һүҙ бирҙе.
Мәктәп ихатаһы ҙур ғына — яҡынса өс гектар. Былтыр хужалыҡ эштәрен алып барған Әҙеһәм ағай Сәғитов 200-ҙән ашыу төп ағас алып килеп ултыртҡан булған. Улар араһында емеш-еләк ҡыуаҡтары ла, ҡайын, миләш, йүкә лә бар. Әлеге акция барышында тағы 200 төп шыршы ултыртылды. “Любизар” клубы ағзалары үҫентеләрҙе Баҡалы районынан алып килгән икән.
Хеҙмәттәшебеҙ Резеда Шәймәрҙәнованың улы Аяз III “А” класында белем ала. Телсән малай ошо акцияла ҡатнашыр өсөн Баймаҡ районының Өмөтбай ауылынан махсус килгән Айҙар ағай Мәжитов менән таныша һалып, өлкәндәр ыңғайына соҡор ҡаҙырға керешеп тә китте. Егеттәрҙең һүҙе лә, эше лә беректе. Айҙар Рәйес улы тарих уҡытыусыһы икән. Ошондай сараларҙың тәрбиәүи әһәмиәте ҙур булыуын билдәләп үтте ул. “Йәштәрҙе үҙ миҫалыңда ғына илһөйәрлеккә өйрәтеп була”, – ти абруйлы уҡытыусы.
— Өй һалдым, ике малай үҫтерәм, баҡсамда әллә күпме емеш ағасы бар хәҙер. Мәктәпкә лә үҙ өлөшөмдө индерәйем әле, – тип баш мөхәррир урынбаҫары Даян Мәжитов бер нисә үҫентене ергә ултыртты. — Малайҙар ошо мәктәпкә уҡырға төшһә, “атайымдың ағастары” тип ғорурланып һөйләрлек булһын.
Әйткәндәй, “Любизар” клубы етәксеһе Илдар Шәйәхмәтов был сара өсөн махсус алтаҡта ла эшләгән. Унда “Любизар” аллеяһы 1812 — 1814 йылдарҙағы Ватан һуғышында башҡорт яугирҙәренең ҡатнашыуына 200 йыл тулыуға бағышлап ултыртылды” тип яҙылған.
Мәктәп баҡсаһының икенсе яғында өлкән класс уҡыусылары картуф сәсә ине.
— Әйҙә, ярышайыҡ! Кем тиҙерәк эшен бөтөр икән? – тип һөрәнләнеләр теге яҡтан.
— Бында ағас күп, ярҙам кәрәк! – тип яуапланыҡ.
Картуф сәсеүселәр, эшен тиҙерәк теүәлләп, беҙҙең яҡҡа ыңғайланы. Күмәкләгән — яу ҡайтарған, тип юҡҡа әйтмәйҙәр. Бер сәғәттә бөтөн үҫентеләрҙе ултыртып та бөттөк. Көр кәйеф менән редакцияға ашыҡтыҡ.
Декрет ялында булыуына ҡарамаҫтан, акцияға ҙур теләк менән ҡушылған хеҙмәттәштәребеҙ Гөлназ Яҡупова менән Алһыу Хужәхмәтова иһә беҙҙе ҡул болғап оҙатып ҡалды.

ӘЙТКӘНДӘЙ…
Баш ҡалабыҙҙың Әхмәтзәки Вәлиди урамы башланған ерҙә, Конгресс-холл ҡаршыһында, Киров районы хакимиәте булышлығында республиканың гәзит-журнал редакциялары етәкселәре лә күптән түгел ағас ултыртҡайны. «Журналистар аллеяһы» исемен алған был урында һомғол йүкәләр япраҡ ярған да инде. Ошондағы «Башҡортостан» гәзите ағасы ла оҙаҡ йылдар тирә-йүнгә йәм биреп торор тигән өмөттәбеҙ. Илфаҡ Смаков йырлағанса:
Өфө йүкәләре
Беҙҙең хаҡта әле
Япраҡ яра-яра һөйләрҙәр...