Уҡытыусылар һәр сараны матур, сағыу байрамға әйләндерә белә. Һөнәри оҫталыҡ, ихласлыҡ, хис-тойғоноң байлығы — барыһы бергә үҙенсәлекле тамаша хасил итә. Республикала 23-сө тапҡыр уҙғарылған “Башҡортостандың йыл уҡытыусыһы” конкурсы ла тап ошондай мөхиттә үтте. Ғәҙәттәгесә, был бәйгелә урыҫ теле һәм әҙәбиәте, татар теле һәм әҙәбиәте буйынса еңеүселәр ҙә асыҡланды.

Иң тәүҙә шуны билдәләп үтәйек: һөйөнөскә күрә, бәйгеселәр араһында йылдан-йыл ир-ат арта бара. Быйыл, мәҫәлән, уларҙың дүртәүһенә финалға сығыу бәхете тейҙе.
Конкурсты йомғаҡлау тантанаһына Башҡортостан Хөкүмәтенең Премьер-министры урынбаҫары Лилиә Ғүмәрова, мәғариф министры Әлфис Ғаязов, юғары уҡыу йорттары ректорҙары, йәмәғәт ойошмалары вәкилдәре, бәйгеселәрҙең хеҙмәттәштәре килде. Лилиә Салауат ҡыҙы, мәғариф тармағы ҙур үҙгәрештәр кисергән осорҙа үҙ һөнәренә, асылына тоғро ҡалған уҡытыусыларҙың хеҙмәтен юғары баһалап, уларға артабан да ижади үрҙәр, уңыштар теләне.
— Белем биреү өлкәһен яңыртыу өсөн күпме генә аҡса бүленмәһен, иң тәүге маҡсатыбыҙ йәш быуынды ғилемле, әхлаҡлы итеп үҫтереүгә ҡайтып ҡала, — тине вице-премьер. — Был бурыстарҙы һәр уҡытыусының теүәл үтәүенә ышанам. Быйылғы тамашаның Фәйзи Ғәскәров исемендәге дәүләт академия халыҡ бейеүҙәре ансамбленең концерт залында үтеүе лә — үҙенсәлекле күренеш. Байрамда ҡатнашҡан һәр уҡытыусының ошо данлыҡлы бейеү ансамбленә исем биргән оло талант эйәһе кеүек үҙ эшенең оҫтаһы булыуын, педагогика өлкәһендә легендар шәхескә әйләнеүен теләйек.
Бәйгеселәр төрлө сәскәнән йыйылған гөлләмәне хәтерләтә: берәүҙәре — ҡаланан, икенселәре — ауылдан, төрлө фәндән белем бирәләр, мәктәп тупһаһына күптән түгел аяҡ баҫҡан йәштәр ҙә, тәжрибәле өлкәндәр ҙә бар. Уларҙың һәр береһенең һәләте, оҫталығы конкурстың номинацияларында билдәләнде.
Иң тулҡынландырғыс мәл яҡынлашты: хәҙер еңеүселәр асыҡланасаҡ! Бына улар: “Башҡортостандың йыл уҡытыусыһы-2013” исеменә Стәрлетамаҡ ҡалаһының 3-сө башҡорт лицей-интернатынан Луиза Мырҙаҡаева лайыҡ булһа, Өфөнөң 115-се гимназияһынан Оксана Шәрәфетдинова — иң яҡшы урыҫ теле һәм әҙәбиәте, Туймазы ҡалаһының 1-се мәктәп-интернатынан Зинфира Нурисламова иң яҡшы татар теле һәм әҙәбиәте уҡытыусыһы булып танылды.
Тамашаға күптән түгел Стәрлетамаҡ ҡалаһында үткән “Башҡорт теле һәм әҙәбиәте йыл уҡытыусыһы-2013” төбәк-ара конкурсында финалға сыҡҡан педагогтар ҙа саҡырылғайны. Ошо барлыҡ бәйгеләрҙә тәүге урынды алғандарҙың араһынан абсолют еңеүсе билдәләнде. Ул — Өфөләге 115-се гимназияның урыҫ теле һәм әҙәбиәте уҡытыусыһы Оксана Шәрәфетдинова! Төп призды яулаған педагог ошондай уҡ конкурста Башҡортостандың данын яҡлаясаҡ.

Раил ӘСӘҘУЛЛИН, М. Аҡмулла исемендәге БДПУ ректоры, конкурстың жюри рәйесе:
— Ете көн барған бәйгелә уҡытыусыларға баһа биреп кенә ҡалмай, уларҙың һәр уңышына ҡыуандыҡ, йәнле аралаштыҡ, бер-беребеҙҙән тәжрибә тупланыҡ. Үҙ эшен, балаларҙы мөкиббән яратҡан, даими үҫешкә ынтылған педагогтарға ҙур рәхмәт!

Оксана ШӘРӘФЕТДИНОВА, бәйгенең еңеүсеһе:
— Хеҙмәтемә ҙур баһа биргән жюри ағзаларына, еңеүгә әйҙәгән хеҙмәттәштәремә, Совет районы хакимиәтенә рәхмәт белдерәм. Алда — ғәҙәти эш көндәре. Уларҙың һәр береһе уҡыусыға дөрөҫ юл бирерлек тормош дәрестәренән торһон ине, тип теләйем.