Һөнәр һәм һәләт. Был ике төшөнсәне айырырға теләмәһәк тә, тормошта улар йыш ҡына бер-береһенә тап килмәй. Ә уҡытыусылыҡ эшендә һөнәрмән булыу ғына аҙ, тәү сиратта һәләт, балаларҙы яратыу фарыз. БДУ-ның Нефтекама филиалында башҡорт филологияһы кафедраһына етәкселек иткән Әнисә Муллағолова тап шундай сифаттарға эйә.

Баймаҡ районының Икенсе Этҡол ауылында тыуған ул. Ғаиләлә алты бала үҫәләр. Дүртәүһе педагог һөнәрен һайлай. Был, әлбиттә, юҡтан түгел, ә ҡандан килгән: өләсәләре Әсмә Баймырҙина ярты быуатҡа яҡын ғүмерен балаларға белем биреүгә арнаған, Батыр Вәлит, Абдулхаҡ Игебаев кеүек шағирҙарҙың, Советтар Союзы Геройы Тәфтизан Миңлеғоловтың тәүге уҡытыусыһы. Әле Баймаҡ районының Күсей ауылындағы бер урам уның исемен йөрөтә.
Әнисә Муса ҡыҙы мәктәп йылдарындағы остаздарын ҙур ихтирам менән телгә ала. "Директорыбыҙ Азамат Тажетдиновҡа, беҙгә күрше йәшәгән Разия һәм Дәүләтбай Ибраһимовтарға ихтирамым сикһеҙ. Белемле, сабыр, ҙур йөрәкле шәхес улар", — ти.
Әнисә Муллағоловаға Сибай педагогия училищеһында, Башҡорт дәүләт университетында ла тәжрибәле, эшен мөкиббән яратҡан шәхестәрҙән — РСФСР-ҙың атҡаҙанған уҡытыусылары Хөснитдин Хәмитов менән Фәриҙә Бикбулатова, Клара Чанышева, Рәсимә Ураҡсина, Марат Зәйнуллин, Роберт Байымов, Әхмәт Сөләймәнов, Лена Сәйәхова кеүектәрҙән — белем алыу бәхете тейә. Юғары уҡыу йортон тамамлағандан һуң тиҫтә йыл Республика һынлы сәнғәт гимназияһында уҡыта, унан БДУ-ның башҡорт әҙәбиәте һәм фольклоры кафедраһына эшкә саҡырыла. Бер нисә йылдан ғилми етәксеһе Роберт Байымовтың кәңәше буйынса БДУ-ның Нефтекама филиалына килә.
— Бында ул ваҡытта башҡорт, урыҫ, сит тел уҡытыусыларын берләштергән филология кафедраһы эшләй ине, — тип иҫкә ала бөгөн Әнисә Муса ҡыҙы. — 2005 йылда айырым башҡорт филологияһы кафедраһы барлыҡҡа килде. Мине уның мөдире итеп һайлап ҡуйҙылар.
Кафедра тарафынан Нефтекама, Ағиҙел ҡалаларының, Яңауыл, Борай, Асҡын, Тәтешле, Ҡалтасы райондарының башҡорт теле һәм әҙәбиәте уҡытыусыларына ғилми-методик ярҙам күрһәтелә, Башҡортостандың мәғарифты үҫтереү институты менән берлектә педагогтарға курстар, семинарҙар ойошторола. Әнисә Муса ҡыҙы шуға ныҡлы инанған: республикала йәшәгән төрлө милләт вәкилдәре аҫаба халыҡтың телен өйрәнергә, белергә, хөрмәт итергә тейеш. Ошо маҡсатты студенттарына ла һалырға тырыша ул. Йәштәргә ныҡлы белем биреүҙән тыш, яҙыусылар, ғалимдар, мәҙәниәт, сәнғәт эшмәкәрҙәре менән осрашыуҙар үткәрелә, Ғ. Соҡорой, Ш. Бабич, Н. Нәжми, Ә. Атнабаев, Б. Алиевтарҙың йорт-музейына, Өфө, Ҡазан ҡалаларына сәйәхәт ойошторола. Бынан тыш, студенттар халҡыбыҙҙың тарихын, мәҙәниәтен, көнкүреш шарттарын тәрәнерәк өйрәнеү өсөн йыл да фольклор һәм диалектология экспедицияларына сыға. Әйтәйек, Балтас, Ҡариҙел, Тәтешле яҡтарында булып, бай мәғлүмәт туплағандар. Ошо нигеҙҙә күптән түгел Әнисә Муллағолованың башланғысы менән "Сыңрау торна" фольклор үҙәге асылған. Тәжрибәле педагог дәрестәрендә лә төплө мәғлүмәт бирә, һәр сәғәтен ҡыҙыҡлы, мауыҡтырғыс итеп үткәрә. Бынан тыш, ғалим булараҡ, ғилми-тикшеренеү эштәре, конференциялар, семинарҙар ойоштора, уҡыу әсбаптары, программалар, монографиялар яҙа, студенттарҙың диплом эшенә етәкселек итә. Әле, мәҫәлән, кафедра уҡытыусылары менән берлектә проза буйынса сираттағы китапты әҙерләйҙәр, башҡорт-төрки филологияһы буйынса Бөтә Рәсәй ғилми-ғәмәли конференцияһына көс туплайҙар.
БДУ-ның Нефтекама филиалындағы филология һәм журналистика кафедраһы доценты, филология фәндәре кандидаты, Башҡортостандың мәғариф отличнигы Әнисә Муллағолова — эшендә генә түгел, тормошта ла күркәм кеше. Ике бала тәрбиәләп үҫтергән әсә бөгөн өләсәйлек бәхетенә лә эйә.
— Алтмыш йылдан ашыу бергә йәшәгән атай-әсәйем беҙҙе сабыр булырға өйрәтте, — ти ул. — Ҡатын-ҡыҙ тәү сиратта ил-йорт йәмен, именлеген һаҡлай. Тырышлыҡ, сабырлыҡ тормошта аһәң тыуҙыра.