Туғыҙ ай элек Пермь районының Башҡолтай ауылында территориаль ижтимағи үҙидара ойошторолдо, уның рәйесе итеп район башҡорттары ҡоролтайының башҡарма комитеты ағзаһы Ф. Сәйҙәшев һайланды. Ошо ваҡыттан бирле башҡарылған эштәр тураһында ул бына нимәләр һөйләне:

— Ауылда йәмәғәт эштәре үҙидара советы һәм урам комитеты көсө менән башҡарыла. Рәсәй Президенты ағымдағы йылды Экология йылы тип иғлан итте. Бөгөн тәбиғәтте һаҡлау — көнүҙәк мәсьәлә. Ҡаты көнкүреш ҡалдыҡтарын фирма менән килешеүгә ярашлы сығара башлауҙы ошо йәһәттән башҡарылған эштәребеҙҙең береһе тип атарға була. Мәҙәниәт йорто төҙөү, скважина ҡаҙыу, һабантуй майҙаны булдырыу өсөн документтар эшләнә башланы. Мәҙәни сараларға килгәндә, сәхнәбеҙ, музыка аппаратураһы, район хакимиәте тарафынан ярҙам булмаһа ла, байрамдар матур үтһен өсөн бөтә көсөбөҙҙө һалабыҙ. Уҙған йыл халҡым, милләт-ара дуҫлыҡ тип янып йөрөүселәрҙең тырышлығы менән бына тигән һабантуй үткәрҙек. Ҡыҙғанысҡа ҡаршы, унда, төрлө район һәм ҡалаларҙан делегациялар ҡатнашһа ла, район етәкселәре килмәне.
Эйе, эшләргә, тағы ла яҡшыраҡ йәшәргә теләк ҙур. Яңыраҡ ҡатын-ҡыҙҙар советы ла ойошторолдо. Был йәмәғәт ойошмаһы уңышлы эшләр, йәшәйешебеҙҙе ыңғай яҡҡа үҙгәртеүгә ҙур өлөш индерер. Мәҙәни үҙәк асыу өсөн мәктәптән бүлмә биреүҙәрен һораныҡ. Теләгебеҙҙе кире ҡаҡмаҫтар, тип ышанабыҙ.