Яңы Нуғай мәктәбендә спортҡа вайымһыҙ бер бала ла юҡ. Белем усағына оҙаҡ йылдар етәкселек иткән шәхес, Рәсәйҙең атҡаҙанған уҡытыусыһы Зикаф Исламовтың тырышлыҡ һөҙөмтәһе был.

Ғүмеренең илле йылын мәғарифҡа арнаған педагог бөгөн дә директорлыҡ вазифаһын дауам итә, физкультуранан уҡыта. Уның хәстәрлеге менән заманса йыһазландырылған белем усағында уңышлы эшмәкәрлек өсөн барлыҡ шарттар бар. Зикаф Исламғәли улы хеҙмәт һөйөүсән, татыу коллектив туплауға өлгәшкән. Педагогтарҙың, уҡыусыларҙың хеҙмәтен, дәрестәрҙең сифатын бер ваҡытта ла күҙ уңынан ысҡындырмай ул. Мәктәп баҡсаһындағы йәшелсә-емеш уңышынан килгән аҡса конкурстарҙа, олимпиадаларҙа һәм башҡа ярыштарҙа дәртләндереү сараһы итеп ҡулланыла.
Зикаф Исламғәли улы етәкселек иткән осорҙа Яңы Нуғай мәктәбе Краснокама районында алдынғы уҡыу йорттарының береһенә әүерелде: 1997 йылда — Рәсәй буйынса "Йыл мәктәбе", 1998 йылда халыҡ-ара "Матур мәктәп" конкурстарында еңеү яуланы, 2007 йылда иһә 1 миллион һумлыҡ грант алды.
Яңы Нуғай мәктәбендә спортҡа ҙур иғтибар бүленә, тигәйнек. Зикаф Исламов физкультуранан уҡытҡан осорҙа ғына беренсе разрядлы 154 спорт инструкторы әҙерләгән. Уның тәрбиәләнеүселәре район һәм республика бәйгеләрендә 35 кубок, 600-ҙән ашыу Маҡтау грамотаһы алған. Араларында еңел атлетика буйынса СССР-ҙың спорт мастеры, халыҡ-ара ярыштарҙа күп тапҡыр призер булған Гөлбирә Нуретдинова ла бар.
Зикаф Исламғәли улы үҙе лә республика бәйгеләрендә даими ҡатнаша. Мәҫәлән, саңғыла уҙышыуҙа Башҡортостан Президенты призын яулаған, Нефтекама ҡалаһында чемпион исеменә лайыҡ булған. Шулай уҡ еңел атлетика, велоспорт, штанга, гер күтәреү буйынса еңеп сыҡҡан.
— Хәҙерге заманда сәләмәт тормош алып барыу — Рәсәй халҡы өсөн төп талап, — ти Зикаф Исламғәли улы. — Бының өсөн балаларҙа бәләкәйҙән физкультураға һөйөү тәрбиәләргә кәрәк. Һәр спорт сараһы, ҡайҙа ғына булһа ла, ҙур байрам кеүек уҙғарылырға тейеш.
Ошондай тырыш, эшен, уҡыусыларҙы мөкиббән яратҡан етәксе булғанда, илебеҙгә бихисап шәхес тәрбиәләгән (уларҙың араһында оҙаҡ йылдар "Альфа банк"тың Башҡортостандағы идараһы рәйесе булған Фәрит Имамов, Башҡортостандың торлаҡ-коммуналь хужалыҡ министры булып эшләгән Ғеман Әсәҙуллин, полиция полковнигы Зенит Лоҡманов һәм башҡа бик күп билдәле кешеләр бар) Яңы Нуғай мәктәбенең киләсәктә лә алдынғылыҡты бирмәҫенә ышаныс ныҡлы.