Бөгөн сығарылыш уҡыусылары алдында бик етди, яуаплы бурыс тора. Тормошта күңелеңә оҡшаған һөнәр һайлау еңелдән түгел, бигерәк тә Берҙәм дәүләт имтихандарының һөҙөмтәһе ҙур әһәмиәткә эйә булған осорҙа. Шуға күрә һәр кемгә күңеле ҡушҡан, киләсәктә шатлыҡ һәм кинәнес килтерә торған йәмғиәткә кәрәкле һөнәрҙе айырып алыу мотлаҡ. Бының өсөн уҡыу йорттары менән бәйләнеш булдырыу кәрәктер.

Тап ошо маҡсаттан сығып ойошторолған да инде Йылайыр ауылында үткән сара. Район хакимиәте башлығы Илгиз Фәтҡуллиндың тырышлығы менән район мәҙәниәт һарайында сығарылыш класс уҡыусылары һәм республиканың туғыҙ юғары уҡыу йорто вәкилдәре осрашты. Бөгөн районда юғары белемле табиптар, математика, физика, информатика уҡытыусылары, ағас эшкәртеү һәм ауыл хужалығы белгестәре етешмәй. Район хакимиәте башлығы билдәләүенсә, йәштәргә уҡыу йортоноң абруйына ҡарап түгел, ә шәхси үҙенсәлектәреңде һәм һәләттәреңде иҫәпкә алып һөнәр һайларға кәрәк.
— Районға заманса фекер йөрөтә белгән, әүҙем һәм инициативалы кадрҙар кәрәк, ә бындай осрашыуҙар, һис шикһеҙ, сығарылыш уҡыусыларына дөрөҫ юл табырға ярҙам итә, — тине Илгиз Лирман улы.
Артабан һәр уҡыу йорто вәкиле уҡыусыларҙы һәм ата-әсәләрҙе ҡабул итеү шарттары тураһында ентекле мәғлүмәт менән таныштырҙы, һорауҙарға яуап бирҙе. Осрашыуҙың ике яҡ өсөн дә отошло булыуын иҫәпкә алып, киләсәктә бындай сараларҙы йышыраҡ үткәрергә кәрәклеген дә билдәләне сығыш яһаусылар.
Илназ АҠҠУЖИН, Йомағужа урта мәктәбенең ХI класс уҡыусыһы:
— Класыбыҙҙа 12 уҡыусы, бөтәбеҙ ҙә бик теләп килдек. Районда осрашыу тәүге тапҡыр үткәрелә, ойоштороусыларға рәхмәт. Мине бигерәк тә техник вуздар ҡыҙыҡһындыра, әле үҙемә кәрәкле бик күп мәғлүмәт алдым. Һөнәр һайлауҙа бөгөнгө сараның әһәмиәте ҙур булыр.
Лилиә ИГЕЛЕКОВА, Матрай урта мәктәбе директорының тәрбиә эштәре буйынса урынбаҫары:
— Һөнәр һайлау — һәр кешенең тормошонда етди аҙым. Был эшкә мәктәп коллективының ғына түгел, район етәкселегенең дә ҙур иғтибар биреүе ҡыуаныслы. Бөгөн йәштәр уҡыу йорттары вәкилдәре менән күҙгә-күҙ осрашты, үҙҙәрен ҡыҙыҡһындырған һорауҙарға яуап алды. Ә инде уҡыу йортон, һөнәр һайлау — һәр кемдең күңел эше.
Фәрит ҠУЖАБӘКОВ, Һабыр ауылы:
— Быйыл улым ХI класты тамамлай, шуға уның менән бергә килдем. Ҡайҙа барырға тигән уй борсой. Бюджет нигеҙендәге, йәғни стипендия түләнгән уҡыу йортона инә алһа, бик шат булыр инек. Шуға күрә бар яҡтан уйлап, аҙаҡ эш таба алырлыҡ йүнәлешкә өҫтөнлөк биреү кәрәктер тигән фекерҙәмен.