М. Кәрим исемендәге Милли йәштәр театрының ил, донъя кимәлендәге был тиклем дә сағыу, күренекле спорт йондоҙҙарын бығаса ҡаршылағаны булмағандыр ҙа. Физик мөмкинлектәре сикләнгән балаларҙың спорттағы тәүге аҙымдарын хуплау һәм яҡлау маҡсатында үткәрелгән хәйриә кисәһенә VI Халыҡ-ара ҡышҡы балалар уйындарында ҡатнашыусыларҙың да килеүе байрамға йәм, күтәренке кәйеф өҫтәне.

— Өфө был көндәрҙә республикабыҙҙың иң йәш граждандары өсөн Олимпия үҙәгенә әүерелде, — тине Башҡортостан Хөкүмәте Премьер-министры урынбаҫары Лилиә Ғүмәрова. — Өлкәндәр өсөн Олимпиада үткәс, ҡағиҙә булараҡ, күп тә тормай Паралимпиада башлана. Халыҡ-ара балалар уйындары комитеты президенты Торстен Раш әфәнде менән был идея хаҡында фекер алышҡанда, ул ошо хәйриә кисәһенең балалар Паралимпиадаһына башланғыс һалыуы ихтималлығын да белдерҙе.
— Беҙ был залға яҡшы уй-теләк менән йыйылдыҡ, — тине “Мәрхәмәт” фондының Попечителдәр советы рәйесе Гөлшат Хәмитова. — Танышыу һәм дуҫлашыу маҡсаты менән. Сәләмәтлегендә проблемалар булыуына ҡарамаҫтан, спорт менән шөғөлләнергә теләүсе балаларға өлкәндәрҙең иғтибарын йәлеп итеү өсөн. Хәйриә кисәһенең оло, оҙайлы дуҫлыҡҡа олғашыуын теләйем.
13 тапҡыр Паралимпия чемпионы, Дәүләт Думаһы депутаты Рима Баталова, һигеҙ тапҡыр Паралимпия уйындары чемпионы Оксана Савченко, 2006 йылда үткән Олимпиаданың көмөш призеры Алексей Селиверстов менән бер рәттән, профессиональ спортҡа тәүге аҙымдарын яһаған үҫмерҙәрҙе йыйған мәртәбәле кисә Башҡортостан күгендә яңы спорт йондоҙҙары балҡыясағына өмөт тыуҙыра.
Байрам бүләкһеҙ буламы ни! Тау саңғыһы, хоккей һәм саңғыла уҙыш буйынса дүрт команда бағыусыларҙан экипировка һәм ҡорамалдар алып һөйөндө. Насар ишетеүселәр өсөн махсус мәктәп-интернат уҡыусылары автобуслы булды.