2011 йылдың йәйендә Иглин районының Урман ҡасабаһындағы шартлауҙар ваҡытында кешеләрҙе ҡотҡарыуы Александр Минеевҡа РБК сайты төҙөгән "Ирҙәрҙең иң ҡыйыу аҙымдары" рейтингына эләгергә мөмкинлек бирҙе.

Полигонға йәнәш умарталығы булған фермер Александр Минеев тәүҙә бер төркөм баланы хәүефһеҙ ергә — яҡындағы урманға — оҙата, артабан зыян күреүселәрҙе эҙләй башлай һәм уларҙы ла тыныс урынға илтә. Ике ҡатынды һәм ығы-зығы ваҡытында әсәһен юғалтҡан ике кескәй малайҙы ҡотҡара. Шул көндә Минеев бер нисә рейд яһай һәм тиҫтәләгән кешене, шул иҫәптән 20 баланы ҡотҡарыусылар һәм медицина хеҙмәткәрҙәре янына алып бара. Александр Минеевтың батырлығы тураһында "Ижтимағи электрон гәзит" тә яҙып сыҡҡайны.
"Былтыр августа Рәсәй Президенты Башҡортостан фермерын "Бәләгә тарығандарҙы ҡотҡарған өсөн" миҙалы менән бүләкләү тураһындағы Указға ҡул ҡуйҙы. Күптән түгел награда геройға тапшырылды.
Шул арала Урманда, Минеевҡа бер миллион һум аҡса биргәндәр икән, тигән буш хәбәр таралған һәм "рәхмәтле" күршеләре уның умарталығы менән йортона ут төрткән. Ә ысынында Александр Минеев зыян күргәндәргә тейешле 50 мең һум күләмендәге матди ярҙамды ла алмаған булған. Хәҙер уға яңы йорт һалырға һәм умарталығын тергеҙергә тура киләсәк, ләкин ул тыуған ҡасабаһын ташлап китергә йыйынмай.
— Хоҙай уларҙы үҙе ярлыҡаһын, — ти Минеев хужалығын үртәгән кешеләр тураһында. — Һаулыҡ булһа, яңынан төҙөрмөн, ләкин яҙ етмәйенсә башлап булмай инде.