Өфөлә Затон биҫтәһенә илтеүсе юлға Ағиҙел аша күпер төҙөй башлаясаҡтар. Ул 2015 йылда файҙаланыуға тапшырыласаҡ.

* * *
Рәсәйҙә миллиардерҙар һаны артҡандан-арта. 2009 йылда илдә барлығы 49 миллиардер булһа, былтыр 131-гә еткән. Иң байы – “Металлоинвест”тың хужаһы Алишер Усманов (19 миллиард доллар самаһы), икенсе – эшҡыуар Владимир Лисин, өсөнсө урында – Виктор Вексельберг. Сәйәсмән Михаил Прохоров бишенсе урынды биләй.

* * *
Силәбе өлкәһендә метеорит түгел, ә боҙ кометаһы төшкән, тип фараз ҡыла белгестәр.

* * *
Рәсәйҙең элекке оборона министры Анатолий Сердюковты ике статья буйынса – мутлашыуҙа һәм үҙ вазифаһын уҫал ниәттә файҙаланыуҙа – ғәйепләүҙәре мөмкин.

* * *
Мәскәүҙең Кутузов проспектындағы банкта бурҙар бер ирҙең сумкаһын урлаған, унда 18 миллион һум аҡса булған.

* * *
Рәсәйҙең ЮХХДИ хеҙмәткәрҙәре юл хәрәкәте ҡағиҙәһен боҙған өсөн таныҡлыҡты тартып алырға түгел, ә штраф күләмен арттырырға кәрәк тигән фекерҙә.

* * *
Уғрылар беҙҙең кеҫә телефондарынан йыл һайын миллиард һумдан ашыу аҡсабыҙҙы сәлдерә.

* * *
Чехияның Нове-Местона-Морове ҡалаһында Биатлон буйынса донъя чемпионаты тамамланды. Беҙҙекеләр ярышта ни бары бер “бронза” менән генә хушһынды, Рәсәйҙәр хатта Франция, Украина, Белоруссия, Польшанан да артта тороп ҡалды. Көйәрмәндәр Сочиҙағы Олимпиадала беҙҙекеләрҙән нимә көтөргә тип яу һала.

* * *
АҠШ-тың Миссисипи штатында 148 йылдан һуң Конституцияға ҡоллоҡто бөтөрөү хаҡында үҙгәреш индерелде.

* * *
АҠШ-та йәнә тәрбиәгә алынған өс йәшлек Рәсәй малайы үлгән. Уны әсәһе психотроп матдәләр менән туҡландырған, туҡмаған.

* * *
Серж Саргсян ҡабаттан Әрмәнстандың президенты итеп һайланған. Ул һайлаусыларҙың 58,64 процент тауышын йыйған.