Гәзит уҡыусыларҙың “Берҙәм Рәсәй” сәйәси партияһы башлаған “Яҡташтар” проектына ҡарата фекерен белер өсөн бер нисә кешегә “Башланғысты нисек баһалайһығыҙ?” тигән һорау менән мөрәжәғәт иттек.

Нәсимә ШЕЛЕХОВА, Өфө районының ветерандар советы рәйесе:
— Район “Яҡташтар” проектына әүҙем ҡушылды. “Өфө үҙәндәре” гәзитендә лә был темаға айырым иғтибар бүленә, шуға баҫманы гел күҙәтеп барам. Әле райондың Геннадий Дорожко, Сергей Ильин, Зоя Коршунова кеүек билдәле шәхестәренең исеме йыш телгә алына. Геннадий Дорожко менән шәхсән таныш инем. Ул оҙаҡ йылдар “Шемәк” совхозы директоры вазифаһын башҡарҙы. Хеҙмәте орден-миҙалдар менән баһаланған маҡтаулы белгес ине. Сәләмәт тормош яҡлы булды, хаҡлы ялға сыҡҡас та, ҡыш һайын саңғыла йөрөнө. Зоя Коршунова иһә беҙҙең һәр сарала әүҙем ҡатнаша, районда абруйлы шәхес.
Педагог булараҡ шуны билдәләгем килә: “Яҡташтар” проекты киләсәк быуын өсөн кәрәк.

Закирйән ӘМИНЕВ, отставкалағы юстиция полковнигы:
— Матбуғатта “Яҡташтар” проектына ярашлы сыҡҡан мәҡәләләр менән танышып барам. Үҙем Баймаҡ районынан. Яҡташтарыма Социалистик Хеҙмәт Геройы Риза Яхинды ошо исемлеккә индереүҙәре өсөн рәхмәтлемен. Уның менән таныш инем, ҡунаҡҡа барып йөрөгәнем дә булды. Асыҡ, ихлас, кешелекле уҙаман булды Риза ағай.
Беҙгә гел ниндәйҙер идеал, өлгө алыр кеше кәрәк. Айырыуса балалар өсөн мөһим был. Мәктәптә уҡығанда шағир Батыр Вәлидтең осрашыуға килгәнен бөгөнгөләй хәтерләйем, билдәле шәхестәрҙең үҫеп килгән быуынға ыңғай тәьҫирен һыҙыҡ өҫтөнә алыр инем.

Динар ӘХМӘТРИСЛАМОВ, Әлшәй районында “Яҡташтар” проекты етәксеһе:
— Халыҡтың фекерен белеү өсөн анкета һорауҙарына яуап алдым, өс көн дауамында йәмғеһе 150 кеше менән һөйләшкәнмен. Яҡташтарыбыҙ тарихи шәхестәргә лә, замандаштары өсөн дә әүҙем тауыш бирә. Халыҡ бер көс булып тупланды тип әйтә алам. Шуныһына иғтибар иттем: “Яҡташтар” проектына тәҡдим ителгән кешене шәхсән белгән осраҡта, күптәр уның был исемгә лайыҡ икәнен дәлилләр өсөн хәтирәләре менән уртаҡлашырға ашыға. Бының ысынлап та кәрәкле сара икәненә инандым.

Илфат ТӨЛКӨБАЕВ, Әбйәлил районының йәштәр ҡоролтайы етәксеһе:
— Районда проект уңышлы тормошҡа ашырыла. Әлеге мәлдә ете меңдән ашыу анкета тултырылған, йөҙҙән ашыу ирекмән эшләй. Тарихи шәхестәрҙән Таһир Кусимов, Фәйзрахман Хисмәтуллин, Ишмырҙа Һиҙиәтов кеүек арҙаҡлылар, замандаштарыбыҙҙан Зиннур Нурғәлин менән Марат Илһамов өсөн күберәк тауыш бирәләр. Шулай уҡ халыҡ туғандарын, эшҡыуарҙарҙы, ауылынан сыҡҡан билдәле шәхестәрҙе тәҡдим итә. Район гәзитендә махсус “Яҡташтар” рубрикаһы булдырылды. Шуныһы ҡыуаныслы: проектҡа халыҡ әүҙем ҡушыла, ирекмәндәр килеп етмәгән булһа, шылтыраталар, Интернет аша тауыш бирәләр.

Фәимә ТИМЕРҒӘЛИНА, Ишембай районының Этҡол ауылы:
— Мәктәптә ошо проектты тормошҡа ашырыу өсөн ирекмәндәр кәрәк булыуы тураһында һүҙ сыҡҡас, төрлө сарала, һайлау эшендә гел ҡатнашҡанымды иҫәпкә алып, директор шунда уҡ мине тәҡдим итте. Ҡыуанып риза булдым. Ҡурҡыуҙы еңеп, икеләнеүҙе ташлап эшкә тотондом. Кешеләр менән аралаштым, үҙем өсөн бай мәғлүмәт тупланым. Халыҡтың күпселеге, “Яҡташтар” тураһында ишетеп, әүҙем ҡушылды. Әлбиттә, тарихи шәхестәрҙән барыһы ла тиерлек Әхмәтзәки Вәлиди Туған өсөн тауыш бирә. Замандаштарға килгәндә, мин үткән урындарҙа халыҡтың күпселеге участка педиатры Фәрзәнә Ғәзизованы тәҡдим итә, уның эшен юғары баһалай. Акция иғлан ителеп, матбуғатта, телевидение аша мәғлүмәт таралыу менән балалар яҡташтарының биографияһы менән ныҡ ҡыҙыҡһына башланы. Башҡорт теле һәм әҙәбиәте уҡытыусыһы булып эшләйем, шуға был мине айырыуса ҡыуандыра.