– Әйҙәгеҙ, төклө аяғығыҙ менән, беҙҙећ оло ҡыуанысыбыҙҙы уртаҡлашығыҙ. Йортҡа күскәнебеҙгә бер аҙна тирәһе генә, – тип ҡыуанып ҡаршы алды Ҡуян ауылында йәшәүсе Екатерина менән Андрей Алмаматовтар. – Шөкөр, күптәнге хыялыбыҙ тормошҡа ашты, хәҙер матур итеп йәшәргә яҙһын...

Әле буяу еҫе лә таралып бөтмәгән бер бүлмәле фатирҙа бөтөн ућайлы шарттар булдырылған. Әлбиттә, күптәрҙе көнләштерерлек бындай торлаҡҡа хужа булыусылар быйыл районда байтаҡ — 14 кеше ошондай бәхет кисерә. Етемдәрҙећ икәүһе үҙ теләге буйынса Ағиҙел ҡалаһынан һәм “Энергетик” биҫтәһенән фатир алһа, ҡалғандарына торлаҡ Ҡуян ауылынан бүленгән.
Шуныһы ҡыуаныслы: республикала етемдәрҙећ һәм ата-әсә ҡарауынан мәхрүм балаларҙыћ торлаҡҡа хоҡуғын яҡлау буйынса байтаҡ эш башҡарыла. Мәсьәләне Президент Рөстәм Хәмитов шәхсән иғтибарҙа тота. Краснокама районында ла “Йорт асҡысы – етем балаларға” тигән программа буйынса фатир асҡыстары тапшырыу матур йолаға әүерелә бара. Ошонан файҙаланып, һућғы өс йылда 40-тан ашыу кеше торлаҡ менән тәьмин ителгән. Әлеге маҡсатта республика бюджетынан — 9,5, федераль ҡаҙнанан 6,7 миллион һум аҡса бүленгән.
Район хакимиәте Ҡуян ауылындағы буш торған бинаны торлаҡ итеп үҙгәртеү тураһында ҡарар ҡабул иткән. Был, беренсенән, күберәк етемде торлаҡ менән тәьмин итергә, икенсенән, күпмелер аҡсаны янда ҡалдырыу иҫәбенә сифатты яҡшыртыу мөмкинлеге биргән. Төп подрядсы булған “Нефтекамастройсервис” йәмғиәтенә лә рәхмәтле фатир хужалары.
Ике ҡатлы йорттоћ коридорҙары, ғәҙәттәгесә, ҡараћғы түгел, асыҡ төҫкә буялған. Йылытыу, электр, канализация системаларын тулыһынса алмаштырғандар, елләткес ҡуйғандар. Иҙәндәрҙе бетон менән тигеҙләп, башта фанера, уныћ өҫтөнә линолеум йәйгәндәр. Аш-һыу бүлмәһендә газ плитаһы һәм ҡаҙанлығы тора – һәр фатир айырым йылытыла, эҫе һыу бар. Ванна бүлмәһендә түшәмдән иҙәнгә тиклем керамик плитә йәбештерелгән. Обойҙар тураһында әйтеп тораһы ла түгел: уларҙыћ ҡиммәтле һәм зауыҡ менән һайланған булыуы күренеп тора. Ҡыҫҡаһы, элекке бинанан диуарҙар һәм түбә генә ҡалған.
– Нәҡ ҡалалағыса шарттар тыуҙырылғас, аш-һыу бүлмәһенән сыҡҡы ла килмәй, ғаиләмде хәҙер тәмле ризыҡ менән һыйлаясаҡмын. Газ плитаһын да бүләк иттеләр бит, – ти хужабикә, ҡыуанысын йәшермәй. – Етемлек тоймайбыҙ, беҙгә ярҙам ҡулы һуҙған йәмғиәткә, изге күћелле кешеләргә рәхмәтлебеҙ.
Фатир мәсьәләһе хәл ителгәнгә ҡәҙәр Алмаматовтар Андрейҙыћ атаһында, бер нисә йыл кеше тупһаһында йәшәй. Бер-бер артлы ҡыҙҙары Валерия менән Виктория тыуғас, “өйҙәш” булыуы күпкә ауырлаша. Йәштәр йорт һалып сығырға уйлай, тик әлеге лә баяғы аҡса мәсьәләһе бәкәлгә һуға.
– Үҙ өйөм тураһында гел хыялландым. Яћы йыл төнөндә шул уҡ теләкте ҡабатланым. Шөкөр, ул тормошҡа ашты, – ти Екатерина, күҙ йәштәренә ирек биреп.
Ун йәшендә генә үкһеҙ етем ҡалһа ла, ул бөгөн үҙен бәхетле һанай, сөнки иркен, яҡты фатиры, янында ић терәрлек ире, береһенән-береһе матур ике ҡыҙы бар. Ошо бәхет түгелме ни?!