Башҡортостан Республикаһы Президенты ҡарамағындағы Һәҙиә Дәүләтшина исемендәге дәүләт премияһы буйынса комиссия, тәҡдим ителгән эштәрҙе ҡарағандан һуң, конкурста ҡатнашыуға балаларға тәғәйенләнгән “Дүрткүҙ” китабы өсөн Стәрлетамаҡ дәүләт башҡорт драма театрының драма артисы Ғәлин Рауил Әхтәрйән улын, “Һайланма әҫәрҙәр. II том” китабы өсөн яҙыусы Әлибаев Сафуан Әфтәх улын (Сафуан Әлибайҙы) индерергә ҡарар итте.

Дәғүәселәрҙең тәүгеһе — Стәрлетамаҡ яҙыусылар ойошмаһы, икенсеһе Башҡортостандың Яҙыусылар союзы тарафынан тәҡдим ителгән.
Комиссия йәмәғәт ойошмаларын, хеҙмәт коллективтарын һәм айырым кешеләрҙе Башҡортостандың балалар һәм үҫмерҙәр әҙәбиәте, сәнғәте өлкәһендәге Һәҙиә Дәүләтшина исемендәге дәүләт премияһына тәҡдим ителгән эштәрҙе тикшереүҙә ҡатнашырға, матбуғат биттәрендә, телевидение һәм радио тапшырыуҙарында, шулай уҡ хаттар аша 25 февралгә тиклем фекерҙәрен, тәҡдимдәрен һәм иҫкәрмәләрен белдерергә саҡыра. Комиссияның адресы: 450101, Өфө ҡалаһы, Туҡай урамы, 46, 419-сы кабинет, телефон: 280-80-75.