1 ғинуарҙан Чернобыль АЭС-ында, "Маяк" заводында, Теча йылғаһына ядро ҡалдыҡтары төшөү арҡаһында, шулай уҡ Семипалатинск полигонында ядро һынауҙары осоронда зыян күргән кешеләргә аҡсалата компенсация артасаҡ. Айлыҡ түләү менән компенсация 5,5 процентҡа индексацияланасаҡ һәм, күләм категорияһына ҡарап, 47 һумдан алып 23 500 һумғаса тәшкил итәсәк.

1 ғинуарҙан әсәлек (ғаилә) капиталы күләме 5,5 процентҡа индексацияланасаҡ һәм 408 мең 960 һум тәшкил итәсәк.

1 апрелдән федераль льготаға эйә булыусылар пенсия менән бергә алған айлыҡ аҡсалата түләүҙәр 5,5 процентҡа артасаҡ.

Мотлаҡ пенсия страховкаһына стараховка иғәнәһенең төп тарифы — 22 процент, ә мотлаҡ медицина страховкаһына 5,1 процент кимәлендә ҡаласаҡ. Мотлаҡ пенсия страховкаһы системаһына страховка иғәнәһе түләнәсәк йыллыҡ эш хаҡының иң юғары күләме 568 мең һум тәшкил итәсәк. Ошонан күберәк эш хаҡы алыусылар 10 процент иғәнә түләйәсәк.

Үҙенә эшләгән кешеләр өсөн мотлаҡ пенсия түләүҙәре күләме икеләтә арта. Ул хеҙмәткә түләүҙең бер минималь күләменән түгел, ә икеләтә күләменән сығып иҫәпләнәсәк. 1 ғинуарҙан хеҙмәткә түләүҙең минималь күләме 5 205 һум тәшкил итә. Тимәк, нотариустар, адвокаттар, шәхси эшҡыуарҙар һәм ошо төркөмгә ингән башҡа кешеләр йыл буйы 32 479,2 һум түләйәсәк (5205 һум х 2 х 26 % х 12). Айына 2706, 6 һум килеп сыға. Мотлаҡ медицина страховкаһына тариф үҙгәрмәй. Ул йылына 3185,5 һум тәшкил итә. Йыллыҡ социаль түләүҙәр 35664,7 һумға тиң буласаҡ.

Быйылғы йылдан зарарлы һәм хәүефле производстволарҙа эш урындары тәҡдим иткән эш биреүселәр өсөн өҫтәмә тариф ғәмәлгә индерелә. 1-се исемлеккә индерелгән эш урындары өсөн өҫтәмә рәүештә — 4, икенсе һәм "бәләкәй" исемлектәр буйынса 2 процент түләргә тура киләсәк.

Пенсия фонды былтыр "бәхет хаттары"н һуңғы тапҡыр ебәрҙе. Конверттар, белдереүҙе баҫыу, почта хеҙмәттәре өсөн фонд 3 миллиард һум аҡса сарыф иткән. Шуға күрә бындай хеҙмәт төрөн туҡтатырға ҡарар ителде. Пенсия иҫәбенең торошон дәүләт һәм муниципаль хеҙмәттәрҙең берҙәм порталы (www.gosuslugi.ru) аша күҙәтергә мөмкин. Ихтыяж тыуһа, Рәсәйҙең Пенсия фондына һорау ебәреп, шәхси иҫәптән өҙөмтә алырға була.

Пенсияны дәүләт менән берлектә финанслау программаһы ғәмәлгә инеү срогы тамамланғанға тиклем туғыҙ ай ҡала. 1 октябргә тиклем программаға ҡушылған осраҡта буласаҡ пенсияға дәүләттән 1:1 принцибы буйынса өҫтәмә алырға мөмкин (йылына иң күбе 12 мең һум күләмендә). Бының өсөн Пенсия фондына ғариза бирергә һәм бер тапҡыр булһа ла үҙ аҡсаңдан иғәнә түләргә кәрәк. Программала эш биреүсе лә ҡатнаша ала.