Баш ҡаланың 29 ойошмаһы эш хаҡын ваҡытында түләмәй, бурыс күләме 93 миллион 692 мең һумға еткән. 3 796 кеше тир түгеп эшләгән аҡсаһын суд аша юллай.
Октябрҙә “Магнетрон” микроэлектроника заводы 2 миллион 32 мең һумлыҡ бурысын ҡайтарған. “Мотор эшләүселәр идаралығы” ябыҡ акционерҙар йәмғиәтенең бурысы, киреһенсә, сентябрҙән 20,4 миллион һумға тиклем үҫкән.



Һамар өлкәһенән “Шишмә” асыҡ акционерҙар йәмғиәтенә ебәрелгән 94 тонна көнбағышта республиканың Россельхознадзор хеҙмәткәрҙәре амброзия тип аталған ҡый үләненең орлоғон тапҡан.
Был орлоҡтар көнбағыш майының тәменә һәм сифатына бер нисек тә тәьҫир итмәй, тип белдерә “Шишмә” ойошмаһының сеймал һатып алыу бүлеге етәксеһе Михаил Бондарь. Көнбағыш тәғәйенләнеше буйынса эшкәртеләсәк.



Быйыл йыл башынан республикала 79 хайуан ҡотороу сиренә дусар булған. Йәнлектәрҙең 67 процентын ҡырағай һәм йорт хайуандары тәшкил итә. Былтыр ҡотороу сирен йоҡтороуҙың 216 осрағы теркәлгән.
Сир осраҡтары Бөрө, Борай, Ғафури, Ишембай, Көйөргәҙе, Шишмә райондарында теркәлгән. Әлегә республикала ҡотороу сиренә бәйле хәл көсөргәнешле һанала, хәүеф аҫтында булған райондарҙа иҫкәртеү саралары алып барыла.



Ҡариҙел районында йәшәүсе бер ир 50 төп ҡарағай ағасын законһыҙ бысҡан өсөн яуаплылыҡҡа тарттырыласаҡ. Енәйәтсегә бер миллион һумлыҡ штраф йәки алты йылға тиклем иркенән мәхрүм ителеү янай.
34 йәшлек ир ҡарағайҙан таҡта эшләп һатҡан. Урман фондына килтерелгән зыян 800 мең һумға баһаланған. Дөйөм алғанда, Башҡортостан Урман хужалығы министрлығы законһыҙ урман ҡырҡыуҙың 530 осрағын теркәгән. Һөҙөмтәлә 7 500 кубометр ағас юҡҡа сығарылған. Республиканың урман хужалығына 46 миллион һумлыҡ зыян килтерелгән. 189 осраҡ буйынса енәйәт эше ҡуҙғатылған.



Дүшәмбегә ҡараған төндә “02” телефонына билдәһеҙ кеше шылтыратып, Өфөнөң 15-се мәктәбендә бомба һалыныуы тураһында хәбәр итә. Уҡыу йортона шунда уҡ полиция, ҡотҡарыусылар, тиҙ ярҙам хеҙмәттәре ебәрелә. Бәхеткә күрә, шартлатҡыс табылмай. Икенсе көнөнә үк шылтыратыусының шәхесен асыҡлайҙар.
Ул ошо мәктәптә белем алыусы IX класс уҡыусыһы булып сыға. Үҫмерҙең уҡырға барғыһы килмәгән һәм хоҡуҡ һаҡлау хеҙмәткәрҙәре шылтыратыусыны тиҙ арала таба аламы-юҡмы икәнлеге ҡыҙыҡһындырған. Быны аңлар өсөн үҫмергә Бәлиғ булмаған хоҡуҡ боҙоусыларҙы ваҡытлыса тотоу үҙәгендә 45 тәүлеккә тиклем ултырып сығырға тура киләсәк. Шулай уҡ үҫмерҙең ата-әсәһе ҙур штраф түләйәсәк.



Кисә Илеш районы үҙәгендәге шәхси йорттарҙың береһендә янғын сыҡҡан, өс кешенең ғүмере өҙөлгән. Янғын һүндереүселәр килеп еткәндә, ут йортто тулыһынса ялмап алған. Янғын һүндерелгәндән һуң 79 йәшлек ирҙең, 72 йәшлек ҡатындың һәм уларҙың 24 йәшлек ейәненең мәйете табылған.
Йорт соландан яна башлаған. Янғын сәбәбен асыҡлайҙар. Ҡыҙғанысҡа ҡаршы, ваҡиға тураһында һуң хәбәр иткәндәр. Әгәр янғын һүндереүселәрҙе саҡ ҡына иртәрәк саҡырһалар, бындай фажиғә булмаҫ ине.



Рәсәйҙең баш санитар табибы Геннадий Онищенко һуңғы аҙнала вируслы инфекция менән ауырыусылар һаны артыуы тураһында хәбәр итте.
Илдең ун төбәгендә киҫкен респиратор инфекция ике йәшкә тиклемге балалар араһында йышайған. Мәскәү, Волгоград, Новгород, Һарытауҙа 7 – 14 йәшлек үҫмерҙәр араһында ауырыу эпидемик сикте үткән.



Европа илдәре араһында Интернет селтәре менән файҙаланыусылар һаны буйынса Рәсәй беренселеккә сыҡҡан.
Илдә 50 810 000 кеше көн һайын Интернет менән файҙалана. Уртаса һандарға күҙ һалһаҡ, рәсәйҙәр айына 22,4 сәғәтен уға “бүләк” итә.



Сирияның баш ҡалаһы Дамаскта оппозиция яғына сыҡҡан хәрбиҙәр Разведка хеҙмәтенең биналар комплексына һөжүм иткән.
Һөҙөмтәлә ике яҡ та егермегә яҡын кешеһен юғалтҡан. Берләшкән Милләттәр Ойошмаһы хәбәр итеүенсә, март айынан башланған бәрелештәрҙә өс меңдән ашыу кеше һәләк булған. Европа союзы Сирияға ҡаршы сикләүҙәр исемлеген арттырған. Союз төҙөгән “ҡара исемлек”кә Сирияның тағы 18 чиновнигы индерелгән.