“Буйың бигерәк тәпәш, үтә лә сибекһең, һинән ниндәй уҡытыусы сыҡһын, — тип ҡаршы ала бала саҡ хыялын тормошҡа ашырып, Башҡорт дәүләт педагогия институтын тамамлаған һәм тәүге тапҡыр эшкә урынлашырға килгән йәш белгесте Оло Ыҡтамаҡтағы лицей директоры. — Уҡыусыларыбыҙҙың күбеһе оҙон буйлы, бик теремек, шуҡ, һин уларҙы тыңлата алмаҫһың...”

“Улайһа, уны үҙем эшкә алам, — тип әйтеп һала шул саҡ бығаса шым ғына ситтә баҫып торған күрше мәктәп директоры. — Эш буйҙа түгел бит, ә был ҡыҙҙың яҡшы уҡытыусы булып китәсәгендә һис шигем юҡ”. Коллегаһының һүҙҙәрен ишеткәс, лицей директоры ҡыҙға иғтибар менән ҡарап тора ла: “Юҡ, ул беҙҙә уҡытасаҡ”, — тип белдерә.
32 йыл элек була был хәл. Шул иҫтәлекле көндән алып Мәсетле районының Аҡа ауылында тыуып үҫкән Рәйсә Мофаззалова ауыл уҡытыусыһы булып китә. Өлкән кластарҙа математика дәрестәрен алып бара. Ентекле әҙерләнеп, төрлө сығанаҡтан алынған мауыҡтырғыс мәғлүмәттәрҙе оҫта ҡулланып, һәр дәресен мауыҡтырғыс итеп, уҡыусыларҙа ҡыҙыҡһыныу уятыу маҡсатына ынтылып үткәрә. Маҡсатына өлгәшә лә. Уның уҡыусылары район һәм республика олимпиадаларында ҡатнаша, еңеүсе лә була.
Рәйсә Рәйес ҡыҙы әйтеүенсә, яҡшы һөҙөмтәләргә өлгәшеү өсөн үҙ һөнәреңде тәрән үҙләштереү, даими рәүештә белемеңде камиллаштырыу, уҡыусыларыңды яратыу, уларҙың киләсәк яҙмышына битараф булмау бик мөһим. “Арҙаҡлы педагогтарҙың асыштарын, алдынғы ысулдарын өйрәнәм дә, уларҙың хеҙмәттәренән үҙемә иң-иң оҡшағандарын һайлап алып, дәрестәремде шуларға таянып ойошторам”, — ти Рәйсә Рәйес ҡыҙы. Ул уҡытҡан лицей районда ғына түгел, тотош төбәктә иң көслөһө тип танылған. Тимәк, уҡытыусыларға талап та юғары.
Был ауыл уҡытыусыһына дәрт һәм сәм өҫтәй. Хәйер, тырышлыҡ, маҡсатҡа ынтылыш кеүек ҡиммәттәрҙе Рәйсә Мофаззаловаға бала сағында уҡ ата-әсәһе һеңдергәндер. Атаһы Рәйес Хатмулла улы Ғиниәтов заманында “Әй” совхозының алдынғы малсыһы булған, әсәһе Зөһрә Ҡолмөхәммәт ҡыҙы — алдынғы һауынсы, райондың почетлы гражданы, төбәктә легендар шәхес, Ленин, “Октябрь Революцияһы”, “Ҡыҙыл Байраҡ” ордендары кавалеры. Был йәһәттән Рәйсә Рәйес ҡыҙы ла әсәһенән ҡалышмай тип әйтерлек: ул — халыҡ мәғарифы отличнигы, Башҡортостандың атҡаҙанған уҡытыусыһы. Район етәкселеге һәм республиканың Мәғариф министрлығы тарафынан бирелгән маҡтау грамоталары байтаҡ уның.
Яңыраҡ арҙаҡлы ауыл уҡытыусыһының киләсәк быуынды лайыҡлы тәрбиәләүгә арналған хеҙмәте тағы бер юғары награда менән билдәләнде — уға “Рәсәй Федерацияһының атҡаҙанған уҡытыусыһы” тигән маҡтаулы исем бирелде. “Бейеклектәргә өлгәшеү еңел булмай, ә шул үрҙе һаҡлап ҡалыу тағы ла ауырыраҡ”, — ти Рәйсә Мофаззалова. Һәм, эштең буйҙа түгел, йөрәктә икәнлеген иҫбатлауын дауам итеп, ең һыҙғанып эшләй ҙә эшләй...