Өләсәйем Дағиә Хәфиз ҡыҙы Ғизәтуллина – герой-әсә, әлеге ваҡытта Өфө ҡалаһында йәшәй. Ул 1929 йылда Бөрйән районының Аҫҡар ауылында ғаиләлә беренсе бала булып донъяға килгән. Өләсәйемдең атаһы Хафиз Әһлиулла улы, һуғыш яланында хәбәрһеҙ юғалып ҡала, шуға күрә, ғаиләлә иң оло бала булараҡ, тормоштоң бөтә ауырлыҡтарын бик иртә татый башлай.
Зифа буйлы, бейек кәүҙәле, аҡыллы, етди ҡарашлы булғанғамылыр, йәштәштәренән күпкә олораҡ күренә. Шуға ла уны Янһары, Бикташ, Аралбай ауылдарына уҡытыусы итеп ебәрәләр. Шул осорҙа Баймаҡ районындағы Темәс педагогия училищеһына уҡырға инә. Бер ауылдан өс ҡыҙ китәләр. Тик уҡыу йортон тамамларға насип булмай: ҡышҡы кейемдәрен алырға тип 110 километр алыҫлыҡтағы Темәстән йәйәү ҡайталар, ә кире барырға булғас, иптәш ҡыҙҙары уҡыуҙы дауам итә алмауҙары тураһында әйтә. Шул араны яңғыҙ йәйәү үтергә ҡурҡып, өләсәйем дә уҡырға бармай.
1948 йылда өләсәйем Аҫҡар ауылы егете – олатайым, Бөйөк Ватан һуғышы ветераны Рәхмәт Ғибат улы Ғизәтуллинды осрата. 58 йыл бергә татыу ғүмер итте улар.
Үҙе училищены тамамлай алмағанға күрә, ҡәҙерлебеҙ балаларының уҡыуын беренсе урынға ҡуя: мәктәп йылдарында һәр ваҡыт дәрестәренә йөрөй, уҡытыусылар менән аралаша, ата-әсәләр комитеты етәксеһе бурысын ихлас башҡара, ауыл ҡатын-ҡыҙҙар ойошмаһы рәйесе була. Тырышлығы бушҡа китмәй – һигеҙ балаһы ла юғары уҡыу йортон тамамлай. Альмира инәйем – ауыл хужалығы фәндәре докторы, Фәйрүзә инәйем – атҡаҙанған матбуғат хеҙмәткәре, Рифҡәт бабайым яңыраҡ Өфөләге юғары дини уҡыу йортон тамамлап, икенсе дипломын алып ҡайтты. Башҡалары ла тормошта үҙ урынын табып, төрлөһө төрлө яҡта тырышып донъя көтә, балалар үҫтерә. Өләсәйемдең 21 ейән-ейәнсәре, 14 бүлә-бүләсәре бар. Үкенескә ҡаршы, олатайым ете йыл беҙҙең арала юҡ инде. Өләсәйем үҙендә был ауыр ҡайғыларға бөгөлөп төшмәҫлек көс тапты.
Һигеҙ балаһы һигеҙ яҡҡа осоп сығып киткәс, тынғыһыҙ, эшһөйәр өләсәйем “Ағиҙел” журналында ғәрәп телен өйрәтеүҙәре тураһында уҡый. Оло йәштә булыуына ҡарамаҫтан, журналдың һәр һанын көтөп алып, үҙ аллы сит телде үҙләштерә башлай һәм маҡсатына өлгәшә. Бөгөн ул ғәрәпсә яҙылған китаптарҙы еңел уҡый. Өләсәйемдең ихтыяр көсөнә һоҡланмаҫлыҡ түгел!
Ҡәҙерлебеҙ ҡул эштәренә лә оҫта. Балаларына бәлтәләренә тиклем үҙе тегеп кейҙергән. Тирүгә, балаҫ һуҡҡан, ойоҡбаш, бейәләй, шәл бәйләгән. Өләсәйемдең тирүгә менән балаҫтары һәр балаһында бар. Ул мине лә ойоҡбаш бәйләргә өйрәтте, ошондай һөнәрем булғанға ҡыуанам.
Өләсәй беҙҙе киноларҙағы кеүек әкиәт һөйләп, бишек йырын йырлап йоҡлатмаһа ла, киләсәгебеҙ мул, матур булһын өсөн тырышыуын беләбеҙ. Балаларыңа ошолай терәк, кәрәк булып, иҫәнлектә, именлектә йәшәүе ниндәй ҙур бәхет!

Әминә ДАУЫТОВА,
Иҫке Собханғол мәктәбенең Х класс уҡыусыһы.
Бөрйән районы.