Хөкүмәт йортондағы был кәңәшмә ғәҙәттәгесә башланманы: район, төрлө ведомство етәкселәре тулы залдың трибунаһына инвалид бала тәрбиәләүсе Рәсимә Әлимғолова сығып баҫты...

Физик мөмкинлектәре сикләнгән бала тәрбиәләүсе әсәләрҙең исеменән сығыш яһап, ул Хөкүмәт ҡарамағындағы координацион совет ағзаларына үҙҙәренең тәҡдимдәрен дә иҫәпкә алыуҙы һораны. Ғәҙәттә отчет биреүҙәргә ҡоролған совет ултырышы был юлы йәнле кәңәшләшеү ҡорон хәтерләтте. Республикала әле 13,5 мең ғаиләлә 14 меңдән ашыу инвалид бала тәрбиәләнә, ә 471-е — балалар йортонда, Хөкүмәт тәьминәтендә.
Кәңәшмәне алып барыусы Премьер-министр урынбаҫары Лилиә Ғүмәрова әйтеүенсә, инвалид бала тәрбиәләүсе ғаиләләрҙән төрлө үтенес, һорауҙар менән тулы хаттар ағымы һис кәмемәй. Ауыр хәлдә ҡалған яңғыҙ әсә проблемалары менән ҡайҙа мөрәжәғәт итергә, артабан тормошто яйлау, баланы тәрбиәләү өсөн ниҙәр эшләргә белмәй ҡаңғыра. Рәсимә Рәйес ҡыҙын диагнозды классификациялау, техник реабилитациялау сараларының түбән сифаты, шифаханаларҙа һауыҡтырыу мөмкинлегенең сикләнгәнлеге, реабилитация үҙәктәренең аҙ булыуы ла бик борсой. “Инвалид бала йәмғиәт тормошонан һис тә ситтә ҡалырға тейеш түгел”, тип иҫәпләй әсә. “Башҡортостан юлдаш телевидениеһы тапшырыуҙарында беҙҙең проблемаларҙы, аһ-зарҙы күрһәтеү урынына физик мөмкинлектәре сикләнгән балаларҙың нисек ауырлыҡтарҙы еңеп, уңышҡа өлгәшеүе хаҡында һөйләһәгеҙ, фәһемлерәк булыр ине”, — тигән фекер ҙә яңғыраны. Лилиә Ғүмәрова ултырышта күтәрелгән күпселек мәсьәләләрҙең финанс сығымдары талап итмәүен, ә ойоштороу эшен юғары кимәлгә еткереү кәрәклеген белдерҙе.
Өфө ҡала хакимиәте башлығы урынбаҫары Әлфирә Баҡыева баш ҡалала йәшәүсе 3800-ҙән ашыу инвалид баланы реабилитациялау, уҡытыу һәм яңы хеҙмәттәр ойоштороуҙағы ауырлыҡтар хаҡында һөйләне. Ғаиләләрҙең мәғлүмәт банкын булдырыу, “Асыҡ мөхит” программаһына үҙгәрештәр индереү кәрәклеге лә көн кеүек асыҡ. Юғары технологиялы ҡатмарлы операцияларҙан һуң сабыйҙарҙы оҙайлы реабилитациялау, ошо маҡсатта 300 урынлыҡ реабилитация үҙәге булдырыуҙың мөһимлегенә лә иғтибар йүнәлтелде. Республика балалар клиник дауаханаһының баш врачы Рөстәм Әхмәтшин медицина кәрәк-ярағының үтә ҡиммәтлеген иҫәпкә алып (бер стимулятор хаҡы ғына бер миллион һум тора!), сабыйҙарҙың ғүмерен ҡотҡарыуға финансты арттырыу кәрәклеген билдәләне.
Бөгөн илдә “Рәсәй Федерацияһы халҡын социаль тәьмин итеү нигеҙҙәре тураһында”ғы Федераль закон проектын йәмәғәтселектә тикшереү, фекер алышыу бара. Ундағы “дәүләт-шәхси партнерлыҡ” тигән яңы төшөнсә инвалид балаларҙы реабилитациялауға ла ҡағыла. “Мәрхәмәт” хәйриә фонды президенты Айгөл Гәрәеваның ошо проектҡа ярашлы яңы перспективалар һәм мөмкинлектәрҙе үҙ эсенә алған сығышы ла ҙур ҡыҙыҡһыныу уятты.
Ғөмүмән, координацион совет эшендә ҡатнашыусыларҙың теләге бер булды: инвалидтарҙы реабилитациялау һәм йәмғиәт тормошона йәлеп итеү буйынса республика маҡсатлы программаһын булдырыу, профессиональ һөнәргә эйә балаларҙы эшкә урынлаштырырға ярҙам итеү, инвалид бала тәрбиәләүсе ғаиләләрҙең ихтыяжын даими өйрәнеү һәм башҡалар. Был бер көнлөк эш түгел, әммә дәүләт органдарының, йәмәғәтселектең аңлашып, ҡулға-ҡул тотоношоп партнерҙарса эшләүе һөҙөмтәһендә хатта тау-таш аҡтарырға ла булалыр.