– Төшкө аш тәмле булдымы?
– Эйе!
Ашхананан гөрләшеп сыҡҡан ҡыҙҙар-малайҙарҙың дәррәү яуаплауы “Красноусол” балалар шифаханаһының баш табибы Әмирйән Сәфәрғоловтың кәйефен күтәрҙе, үҙенең дә ошо сабыйҙар кеүек бәхетле бала сағы иҫенә төштө.

Ғафури районының Юлыҡ ауылында тыуып үҫә ул. Бәләкәйҙән табип булырға хыяллана. Мәктәптән һуң медицина училищеһын, унан институт тамамлай. Оҙаҡ йылдар Стәрлетамаҡ ҡалаһында төрлө вазифалар башҡара. Быйыл йәй ошо шифаханаға етәксе итеп тәғәйенләнгәс, дәртләнеп эшкә тотона.
Тәбиғәттең йәннәт кеүек төбәгендә урынлашҡан был шифахана үҙенең ғәжәп тәбиғи сығанаҡтары менән дан тота. Минераль һыу, ләм менән дауалау үҙенсәлектәре буйынса балалар шифаханалары араһында айырым урын биләй. Ашҡаҙан, аяҡ-ҡулдар, нервы, тире һәм башҡа ауырыуҙарҙан яфаланыусылар һаулығын нығыта бында. Балалар минераль һәм озон ванналарына, галотерапия, ингаляция, дауалау физкультураһы, кислород коктейле, электр йоҡоһо кабинеты, гидромассажға ихлас йөрөй. Ләм, гальваник процедуралар, магнит һәм лазер терапияһы ла, диетик туҡланыу яҡшы һөҙөмтәләр бирә. Бында аяҡһыҙ килгән балаларҙың атлап киткәне лә бар.
Йыл әйләнәһенә биш меңгә яҡын бала сәләмәтлеген нығыта бында. Уларҙы уҡыуынан өҙмәҫ өсөн төрлө фән буйынса тәжрибәле уҡытыусылар дәрес алып бара.
Йәшерен-батырын түгел: әлегәсә балалар шифаханаларына иғтибар етешмәне. Әкренләп был хата төҙәтелә башланы: быйыл ғына Хөкүмәтебеҙ тарафынан өс миллион һум аҡса күсерелде. Уны янғын хәүефһеҙлеге ҡорамалдарын яңыртыуға, иҙәндәрҙе алмаштырыуға тотондолар.
Артабан да балалар шифаханаһы етәкселәр иғтибарынан ситтә ҡалмаҫ, моғайын. Әйткәндәй, 2010 йылдан “Әсә һәм бала” бүлексәһе лә эшләй.
— Баҙар шарттарында йәшәйбеҙ. Киләсәктә ошо бүлексәне үҫтереп, дауаланыусыларҙы тағы ла күберәк ҡабул итергә ине, – тип уй-ниәттәре менән уртаҡлаша баш табип.
Бында өлкәндәр ҙә дауалана ала, әлбиттә. Улар өсөн эсәктәрҙе таҙартыу, ынйылы ванна, умыртҡалыҡты һыуҙа һуҙыу процедуралары уңышлы эшләй.
Шифахананың абруйы сит тарафтарҙа ла билдәле. Хатта Мәскәүҙән, Себер яҡтарынан да килеп етәләр. Шуларҙы иҫәпкә алып, йәйгелеккә бюджеттан тыш та юллама һатыуҙы ойошторҙолар. Дауаланыусыларҙың ялын күңелле, файҙалы итеп ойоштороу йәһәтенән ҙур тырышлыҡ һалына. Төрлө кисәләр, концерттар, дискотекалар, спорт ярыштары гөрләп үтә.
Шифаханала балаларҙы, үҙ эшен яратҡан, ихлас күңелле, яҡты йөҙлө, йылы һүҙле, тәжрибәле кешеләр эшләй. Баш табип урынбаҫарҙары Тәлғәт Шаһманов, Әмир Юлъяҡшин, баш шәфҡәт туташы Гөлназ Барменкова, өлкән шәфҡәт туташы Фәнилә Мәүлетова, Хатмулла Ғарифуллиндар – етәксенең ышаныслы терәге. Физиотерапия бүлеге хеҙмәткәрҙәре медицина университеты менән тығыҙ хеҙмәттәшлек итә, үҙҙәренең оҫталығын даими арттыра.
Корпустарҙа йөрөгәндә баш табип йәнә дауаланыусыларҙың кәйефе менән ҡыҙыҡһынды.
— Оҡшай.
— Киләһе йыл тағы ла киләбеҙ.
— Тирә-яҡ мөхит һоҡланып туйғыһыҙ, – тип яуапланы һәр береһе.
Ғәжәп үҙенсәлекле тәбиғәт ҡосағында ял итеү, һаулығыңды нығытыу һәр кемгә оҡшай шул. Тауҙарҙан бөркөлгән саф һауа, урман еҫе лә имләй кеүек. Ошо сихәтте бер тойғандар ҡабат-ҡабат килә был яҡтарға, сөнки әҙәм балаһына һаулыҡтан да ҡәҙерлерәк байлыҡ юҡ.