Башҡортостан йәмәғәтселеге ҙур юғалтыу кисерҙе. 2011 йылдың 1 декабрендә арҙаҡлы шәхес, Башҡорт АССР-ының атҡаҙанған мәҙәниәт хеҙмәткәре, халыҡ мәғарифы отличнигы, бар ғүмерен балалар тәрбиәләүгә арнаған билдәле педагог, күренекле йәмәғәт эшмәкәре Сафиулла Ғөбәйҙулла улы Назарғолов 84-се йәшендә яҡты донъянан китеп барҙы.
Сафиулла Ғөбәйҙулла улы Назарғолов 1928 йылдың 3 мартында БАССР-ҙың Йомағужа районының (хәҙерге Мәләүез районы) Түбәнге Таш ауылында донъяға килә.
Мәләүез районының “Ирек” колхозында ябай колхозсы, бригадир, хисапсы булып эшләгәндән һуң ул Совет Армияһы сафтарында хеҙмәт итә. Күмертауҙа “Башуглеразрезстрой” тресының шахта төҙөү идаралығы партбюроһы секретары итеп һайлана, ә 1955 йылдан Күмертау ҡала Советы башҡарма комитеты рәйесе урынбаҫары була.
1956 йылдан 1960 йылға тиклем С.Ғ. Назарғолов Өфө юғары партия мәктәбендә уҡый, уны тамамлағас, “Күмертаустрой” тресының Нөгөш махсус идаралығы партбюроһы секретары була, артабан Күмертау ҡалаһының 2-се эшсе йәштәр мәктәбе директоры булып эшләй.
1965 йылда БАССР мәғариф министры Ф. Мостафина тәҡдиме менән Стәрлетамаҡ ҡалаһындағы В.И. Ленин исемендәге балалар йортона директор итеп тәғәйенләнә. Етмешенсе йылдар башында балалар йорто яңы бинаға күсерелә һәм В.И. Ленин исемендәге мәктәп-интернат тип үҙгәртелә.
1970 йылдан алып Сафиулла Назарғолов етәкселегендәге Ленин мәктәбе тарихының яңы биттәре яҙыла башлай. Яңы урында йәш коллективтың берҙәм булып эшләп китеүенә Сафиулла Ғөбәйҙулла улы күп көс һалды. Етәксе, балалар, уҡытыусы һәм тәрбиәселәр алдына яңынан-яңы маҡсаттар билдәләп, Ленин мәктәбенә ҡуйған төп идеяларҙы тормошҡа ашырыу өҫтөндә эште дауам итте.
Мәктәп-интернатта уҡыусыларҙа ергә һөйөү һәм яңы хужа булыу сифаттары хеҙмәт аша тәрбиәләнде. Һәләтле, киләсәкте тиҫтәләрсә йылдарға алдан күрә белгән етәксе белем усағының матди-техник базаһын нығытыуға күп көс һалды. 2-се мәктәп-интернаттың яңы бинаһы, ярҙамсы хужалыҡтар, гараж һәм оҫтаханалар төҙөлдө. Быларҙың барыһы ла эш тәжрибәһе үткәреү йәки ял урыны ғына түгел, ә файҙалы эш урынына әүерелде.
1975 йылда, Бөйөк Еңеүҙең 30 йыллығына арнап, мәктәп ихатаһында Ленин мәктәбенең Бөйөк Ватан һуғышында һәләк булған тәрбиәләнеүселәре, уҡытыусылары, тәрбиәселәре иҫтәлегенә обелиск асылды. 80-се йылдарҙа мәктәптең данлы тарихын кәүҙәләндергән “Туған мәктәбем” крайҙы өйрәнеү музейы булдырылды. Мәктәп уҡыусылары тарафынан ойошторолған “Ҡыңғырау” өлгөлө хор коллективы төрлө кимәлдәрҙәге фестивалдәрҙә, конкурстарҙа әүҙем ҡатнашты һәм Мәскәүҙә уҙған Бөтә Союз халыҡ хужалығы ҡаҙаныштары күргәҙмәһендә бронза миҙалға лайыҡ булды. Ә бит былар барыһы ла етәксенең булдыҡлылығынан, тырышлығынан килә.
Сафиулла Ғөбәйҙулла улы Назарғолов етәкләгән йылдар — В.И. Ленин исемендәге 2-се лицей-интернат тарихындағы иң аҫыл осорҙарҙың береһе. Ул үҙенә генә хас талапсанлыҡ, изге күңеллелек, ябайлыҡ, кешеләргә иғтибарлы ҡараш кеүек иҫ киткес күркәм сифаттары менән айырылып торҙо. С.Ғ. Назарғоловтың фиҙакәр хеҙмәте юғары баһаланып, Хеҙмәт Ҡыҙыл Байраҡ ордены, “В.И. Лениндың тыуыуына 100 йыл тулыу айҡанлы” һәм “Бөйөк Ватан һуғышы йылдарындағы ҡаһарманлығы өсөн” миҙалдары менән бүләкләнде, “БАССР-ҙың атҡаҙанған мәҙәниәт хеҙмәткәре” тигән маҡтаулы исемгә лайыҡ булды.
С.Ғ. Назарғолов етәкләгән йылдарҙа мәктәп-интернат РСФСР Мәғариф министрлығы һәм Республика профсоюз комитетының Маҡтау грамоталары, РСФСР Юғары Советы Президиумының Маҡтау грамотаһы, БАССР Мәғариф министрлығының, мәғариф хеҙмәткәрҙәре өлкә комитетының, ҡала халыҡ мәғарифы бүлеге, ғилми учреждениелар һәм юғары мәктәптәрҙең Маҡтау грамоталары менән бүләкләнде.
Һәләтле етәксе, оҫта ойоштороусы һәм һоҡланғыс кеше Сафиулла Ғөбәйҙулла улы Назарғолов хаҡында яҡты иҫтәлек беҙҙең йөрәктәрҙә мәңге һаҡланыр.
Йәнең йәннәттә булһын, бәхил бул, һөйөклө остазыбыҙ, арҙаҡлы ил ағаһы!