Американың элекке президенты, күренекле дәүләт һәм хәрби эшмәкәре Дуайт Эйзенхауэрҙың әйтеп ҡалдырыуынса, халыҡты мәғлүмәтле итеүгә бүленгән бер доллар армияны ҡоралландырыуға йүнәлтелгән биш долларға торошло. Өфөлә уҙған "Ҡала мөхите" VIII халыҡ-ара социаль реклама фестивале был йәһәттән бер ҙур армия булдырыуға өлгәште, тиергә мөмкин. Йәмғиәттәге, һәр беребеҙҙең холҡо һәм аңындағы кире күренештәргә ҡаршы көрәшеүселәр ғәскәре ул. Тормоштағы киҫкен мәсьәләләргә битараф була белмәгән конкурсанттарҙың төп ҡоралы — ҡәләм һәм һүҙ.
Республикабыҙҙа һуңғы һигеҙ йылда уҙған сараларҙың күбеһе тиҙ арала онотолдо, йолаға әүерелә алманы, ә бына "Ҡала мөхите" халыҡ-ара кимәлгә тиклем үҫеүгә өлгәште. Тимәк, коммерция нигеҙендәге сағыу, күҙгә инеп барған рекламанан ялҡҡан халыҡтың социаль йүнәлештәге лозунгтарға ихтыяжы ҙур.
— Быйыл Рәсәй, Украина, Белоруссия, Ҡаҙағстан, Ҡырғыҙстан, Германия илдәренән 600-ҙән ашыу эштең килеүе, фестивалгә ярҙам итеүсе министрлыҡ һәм ҙур компанияларҙың артыуы, яңыраҡ дәүләт грантының бирелеүе лә сараның әһәмиәте, йәмғиәтебеҙгә кәрәкле булыуы хаҡында һөйләй, — тине Башҡортостандың Матбуғат һәм киң мәғлүмәт саралары буйынса агентлығы етәксеһе урынбаҫары Марат Ғәзизов журналистар менән осрашыуҙа.
Фестивалдең төп үҙенсәлектәренең береһе — йәш буйынса сикләүҙең булмауы. Быйыл хаҡлы ялдағыларҙыҡы менән бер рәттән 14 йәшлек үҫмерҙәрҙең эшен дә күрергә мөмкин ине. Алтмышты ҡыуған Ишембай ҡалаһы пенсионеры Валентин Асачин сәләмәт тормошҡа саҡырған ике юллыҡ тапҡыр шиғырҙарын тәҡдим иткән һәм, үҙенең әйтеүенсә, көтмәгәндә еңеүселәр рәтенә сыҡҡан. "Күңелгә ятышлы халыҡсан шиғри юлдар кешегә ҡиммәтле рекламанан да көслөрәк тәьҫир итә", — тине ул беҙгә.
Еңеүселәр араһында йәш әсә Татьяна Карцева ла бар ине. Бер-береңде милләткә ҡарап айырмаҫҡа саҡырған һүрәте менән еңеү яуланы ул. "Сабыйым тыуғас, кешеләрҙең үҙ-ара мөнәсәбәте тураһында тәрәнерәк уйлана башланым", — тине рәссам.
Фестиваль күргәҙмәһен ҡараусыларҙы иң тетрәндергәне Тимур Сабитовтың "Шихандар" тигән теҙмәһе булғандыр, моғайын. "Шихандар юғалһа, йөрәгебеҙҙе (Йөрәктау) юғалтасаҡбыҙ", "Кемдер үҙенә миллиондарса һум аҡса эшләр, әммә 300 миллион йыллыҡ тарих юғалыр" кеүек яҙыуҙарҙы, ысынлап та, әрнемәйенсә уҡып булмай. Был эштәр I урынға лайыҡ булды.
Жюри менән халыҡ һөйөүен яулаған эштәр матбуғат баҫмалары, урамдағы реклама таҡталары һәм телевидение аша киң йәмәғәтселеккә, юғары етәкселеккә барып етһә, фестивалдең абруйы тағы ла артыр ине.