Ҡырмыҫҡалы башҡорттары ҡоролтайы башҡарма комитеты ағзаларын, ойошмалар етәкселәрен, мәктәп коллективтары вәкилдәрен хакимиәт башлығы Фәнзил Сыңғыҙов тәбрикләне. Ул райондың социаль-иҡтисади хәле менән таныштырып, ауыл хужалығы, мәғариф һәм мәҙәниәт мәсьәләләренә туҡталды. Район башҡорттары ҡоролтайы башҡарма комитеты рәйесе Илмира Ғәлиәхмәтова атҡарылған эштәргә байҡау яһаны һәм көнүҙәк мәсьәләләрҙе бәйән итте.

– Алдыбыҙҙа торған иң ҙур проблемаларҙың береһе – мәктәптәр яҙмышы, — тине ул. — Киләсәгебеҙ уларҙың эшмәкәрлегенә ныҡ бәйләнгән. Ауылдың тормош һулышы булған белем биреү йорттарын һаҡлап ҡалыу балалар һанына бәйле. Шуныһы ҡыуаныслы: быйыл районда бер белем усағы ла ябылманы.
Илмира Әнүәр ҡыҙы әйтеүенсә, имен булмаған ғаиләләр һанының артыуы, эшһеҙлек, эскелек мәсьәләләре райондың бәҫен төшөрә.
Район башҡорттары ҡоролтайы башҡарма комитеты рәйесе урынбаҫары Ғәлинур Ҡотлогилдин, Иҫке Бәпес ауыл Советы хакимиәте башлығы Нурия Иштуғанова, райондың башҡорт ҡатын-ҡыҙҙары йәмғиәте рәйесе Эльза Саттарова, Бишауыл-Уңғар мәктәбе уҡытыусыһы Рим Исхаҡов сығыштарында үҙҙәрен борсоған мәсьәләләр хаҡында һөйләне.
Бөтә донъя башҡорттары ҡоролтайы башҡарма комитеты ағзаһы Фәнзил Санъяров:
– Һуңғы ваҡытта йәмәғәт ойошмаларының эшмәкәрлеге киңәйә бара, сөнки бар йәмәғәтселек ҡатнашҡанда ғына төрлө социаль, иҡтисади мәсьәләләрҙе хәл итергә мөмкин, — тине. — Проблемаларҙы аңлап хәл итергә кәрәк. Хәл ителмәгән мәсьәләләр ҙә юҡ түгел. Уларҙы тормошҡа ашырыуҙа Ҡоролтай һәм уның етәкселеге лә көс һалыр, тип уйлайым.
Филология фәндәре докторы, профессор Тимерғәле Килмөхәмәтов үҙ сиратында районда Өфө – Ҡырмыҫҡалы турист маршрутын асыу һәм Еңеү паркындағы обелисктарҙы яңыртыу, ә шағир Ирек Кинйәбулатов район үҙәгендә башҡорт гимназияһын булдырыу тәҡдимдәре менән уртаҡлашты.
Йәштәрҙе милли рухта тәрбиәләү йәһәтенән районда «Һылыуҡай», «Сая ҡыҙҙар» конкурстары, башҡорт дискотекаларын уҙғарыу кәрәклеге хаҡында Ҡоролтайҙың йәштәр советы ағзаһы Эльнара Әүәкәсова сығыш яһаны.
Ҡоролтайҙа шулай уҡ Рәсәй һәм Башҡортостан Журналистар союзы ағзалары Марат Хәсәновтың «Өлөшөм көмөштәре» һәм Рәмилә Сәйфуллинаның «Район картаһы эргәһендә» китаптарының исем туйы булды. Ун биш йәш ғаиләгә «Торлаҡ» федераль маҡсатлы программаһы буйынса таныҡлыҡтар тапшырылды.