– Ауылда йәшәгәс, һыйырҙан айырмаһын инде. Әле бөгөн төндә берәүһе быҙауланы, имен-һау ҡотолдо былай, – тип ҡаршыланы беҙҙе хужабикә Линария Шәйнурова. – Мал-тыуарһыҙ, ай-һай, нисек көн итмәк кәрәк?

Ысынлап та, ауыл ерендә мал аҫрамаған ғаилә һирәк осрай – һәр кем ит-һөткә мохтажлыҡ күрмәҫкә тырыша. Күптәр бөгөн ҡураһында хатта өс-дүрт баш һыйыр тота, уның араһында һарығы ла, кәзәһе лә бар. Ҡош-ҡорт тураһында әйтеп тораһы ла түгел. Халыҡ үҙенән артып ҡалған ағын баҙарға сығара, уны аҡсаға әйләндереп, балаларын уҡыта, кейендерә. Балтас районының Боғҙан ауылында ла халыҡ бөгөн эш юҡлыҡҡа һылтанып, ҡул ҡаушырып ҡына ултырмай, һәр кем үҙенсә яйын табып йәшәргә ынтыла.
Ауылға газ үткән, район үҙәгенә тиклем юл бар, һөтсөлөк фермалары эшләй. Шәхси эшҡыуарҙарҙың сауҙа нөктәләрендә йәнең нимә теләй, шуны һатып алырға була. Ялҡау кеше генә "алма беш, ауыҙыма төш" тип кемдәндер ярҙам көтәлер. Линария менән Ғәйетхан Шәйнуровтар ундайҙарҙан түгел, икеһе лә тиндән һум яһарға тырыша. Райондың Нажар ауылынан килен булып төшкән Линарияның уңғанлығына һоҡланалар.
Тырыш ғаиләлә бөгөн ике бала – алты йәшлек Лилиә менән өс йәшлек Айҙар – үҫә. Балалары йәш тип тормай, ҡура тултырып малын да аҫрайҙар, ҡош-ҡортон да үрсетәләр. Баҡсалағы емеш-еләккә, йәшелсәгә күптәр ҡыҙығалыр әле, моғайын. Һалҡын ҡышта рәхәтләнеп консерваланған витаминлы аҙыҡтан ауыҙ итеүе ни тора! Быны Шәйнуровтар яҡшы аңлай, шуға ла бал ҡорто кеүек алһыҙ-ялһыҙ көс түгә.
– Туған хужалығымда 1990 йылдан бирле эшләйем, хәрби хеҙмәт үттем. Ҡалаға эшкә барырға мөмкинлек булды, әммә ауылды ҡалдырманым, бүтән тормошто үҙ итмәнем, – ти ғаилә башлығы Ғәйетхан.
Шәйнуровтар хаҡында бәхетле ғаилә тип әйтергә була. Икенсегә улдары тыуғас, әсәлек капиталын төҙөлөшкә тотонорға уйлап, 2008 йылда үҙ йорттарына нигеҙ һалалар. Күп тә үтмәй, "Ауылды социаль үҫтереү" программаһына инеүҙәре хаҡында һөйөнсөләйҙәр. Әлбиттә, йәш ғаиләнең ҡыуанысының сиге булмай. "Күктән төшкән" аҡсаны, әсәлек капиталын да ҡушып, туғандары, дуҫ-иштәре ярҙамында шығырҙап торған ҡарағайҙан бына тигән өй күтәреп сығалар.
Ғәйетхан – "Россия" яуаплылығы сикләнгән йәмғиәтенең алыштырғыһыҙ механизаторы. Йәйен-көҙөн баҫыуҙа булһа, ҡышын хужалыҡтан ҡайтып инмәй. Етәкселек уны ихтирам итә, күптәргә өлгө итеп ҡуя. Эштә генә түгел, ғаиләһендә лә ул – абруйлы тормош иптәше, балалары өсөн хәстәрлекле атай.