Атанан күргән — уҡ юнған, тигәндәре бигерәк раҫ. Мәктәпте тамамлағас, Вадим Тажмөхәмәтов һис икеләнмәйенсә аграр университеттың агрономия факультетына уҡырға инә, сөнки атаһы Хәмит Арин улы ла ғүмерен ауыл хужалығына арнаған — йәш саҡта агроном булараҡ хеҙмәт юлын башлап, аҙаҡ парторг, унан инде Ейәнсура районының “Инәк” совхозы директоры йөгөн тартҡан. Күрәһең, уның совхоз эше тип янып-көйөп йәшәүе улы өсөн эҙһеҙ үтмәгән.

Һуңғы курстарҙа Вадим практиканы атаһы етәкселек иткән хужалыҡта үтә. Университетта яҙған диплом эше лә нәҡ “Инәк” совхозы баҫыуҙарының уңдырышлылығын күтәреү ысулдарына арнала. 1993 йылда юғары уҡыу йортон тамамлаған йәш белгес йүнәлтмәне тыуған районына ала һәм ҡайтыу менән ең һыҙғанып эшкә тотона.
Атаһы етәкселегендә ныҡлы аяҡҡа баҫҡан һәм районда иң алдынғыларҙан иҫәпләнгән “Инәк”те лә үҙгәртеп ҡороу еле урап үтмәй. Инде матди-техник базаһы юҡҡа сыға тигән ерҙән район етәкселеге, дөрөҫ ҡарарға килеп, хужалыҡты бар мал-мөлкәте менән “Ергән” МТС-ына ҡуша. Шулай итеп, МТС-тың Ейәнсура бүлексәһе — “Инәк” участкаһы — барлыҡҡа килә. Райондың тағы ла бер нисә хужалығын ошо уҡ участкаға ҡушалар. Һөҙөмтәлә сәсеүлектәр майҙаны һәм эш фронты тағы ла арта. Ә Вадим Хәмит улы иңенә участканың өлкән агрономы вазифаһы йөкмәтелә.
— Хәҙер хужалыҡтың 22 мең гектар ере бар. Ошо майҙанда сәсеү әйләнешен дөрөҫ ойоштороу фарыз. Диплом эшемдә үк башлаған йүнәлеште дауам итеп, ерҙең уңдырышлылығын арттырыу буйынса планды даими бойомға ашырам. Әлбиттә, был бер йыллыҡ ҡына эш түгел. Башлыса ҡандала үләнен ҡулландыҡ, әле лә ҡулланабыҙ, сөнки уның тамыры, сабылғандан һуңғы ҡалдыҡтары тупраҡтың сифатын яҡшырта. Бынан тыш, һуңғы йылдарҙағы ҡоролоҡ үҙен аҡлаған яңы технологияларҙы үҙләштерергә мәжбүр итә. Атап әйткәндә, new-till технологияһын, йәғни ерҙе һөрмәйенсә эшкәртеү алымын ҡулланабыҙ, — ти заман менән бергә атлаған агроном.
Әйткәндәй, хужалыҡта хәҙер малсылыҡ тармағына нығыраҡ баҫым яһала — көтөүгә сығарылмайынса, ҡурала ғына аҫралған 1200 баш һыйырлы мегаферма өсөн мал аҙығы әҙерләү иң мөһим бурыстарҙың береһе һанала. Бының өсөн агрономия хеҙмәтенә лә үҙ эшмәкәрлеген ошо йүнәлештә үҙгәртергә тура килә: кукуруз, судан, люцерна үләндәре, ҡуҙаҡлылар майҙанын арттыралар. 2010 йылғы һәм быйылғы ҡоро, эҫе йәйҙә малдарҙы бесән, силос, сенаж, шулай уҡ ҡатнаш аҙыҡ менән тейешенсә тәьмин итеү өсөн кемдәрҙең генә сикә сәстәренә сал төшмәне икән?!
Вадим Хәмит улы бөгөнгө МТС-тың матди-техник базаһына, финанс мөмкинлектәренә хайран ҡала. Элек “Инәк” совхозында ғына 50 — 60-лаған комбайн була торғайны, хәҙер иһә улар башҡарған эш күләмен МТС-тың сит илдән һатып алған ҡеүәтле техникаһы “һә” тигәнсе башҡара ла ҡуя бит.
— Ҡатмарлы техниканы хеҙмәтләндереү өсөн, әлбиттә, хәҙерге заман белеменә эйә булған кешеләр кәрәк. Шуға ла хужалыҡта башлыса йәштәр эшләй, — ти Вадим Тажмөхәмәтов.
Атаһы ҡулы аҫтына йәш белгес булып ҡайтып төшкән Вадим хәҙер инде районда иң тәжрибәле агрономдар иҫәбендә. Оҙаҡ йылдар уңышлы эшләгәне өсөн уны район етәкселеге юғары дәүләт наградаһына лайыҡ тип иҫәпләй.