Юҡ, ул фажиғә булмаҫ, тип үҙемде тынысландырырға теләһәм дә, сәбәп сыҡҡас, демократияның төп принциптарына нигеҙләнеп, Торатау мәсьәләһенә ҡарашымды матбуғатта тағы белдермәксемен.

Ер йөҙөндә тиңе булмаған, Бөтә донъя тәбиғәт ҡомартҡыларын һаҡлау ойошмаһының исемлегенә индерелгән изге тауыбыҙҙың яҙмышына һаман ҡул һуҙырға маташҡан әҙәмдәр, халыҡты һемәйтергә тырышып, митингтар ойоштора. Алдашыуға барып, вәғәҙәләргә ышандырып, киләсәк быуын хаҡын уйламайынса, улар халыҡтан имза йыя.
Тәбиғәт байлыҡтары йылдан-йыл кәмей барған Башҡортостаныбыҙҙа әүәлдән ата-бабаларыбыҙ ҙа аҙым һайын алданған, тормоштоң әсе-сөсөһөн буйтым татыған. Бөгөн иһә беҙ, уларҙың вариҫтары, ике тиҫтә йыл капитализм төҙөгәндән һуң АҠШ-та барған көрсөктөң ғәләмәттәрен татыйбыҙ һәм артабан да татыясаҡбыҙ әле.
Торатауҙы һәм Йөрәктауҙы бай сәнәғәтселәргә биреп, “ожмах иле”нә — әйтәйек, Кипр утрауына — күсеп китергә уйламайбыҙҙыр бит. Капиталистарға ярап булмай: һауабыҙҙы, ер-һыуыбыҙҙы бысратҡан, балаларыбыҙҙың сәләмәтлегенә зыян килтергән өсөн республикабыҙға, ҡалабыҙға аҙмы-күпме ярҙам иткәс, ни ҡыланһаҡ та хаҡлыбыҙ, тип уйлайҙар, күрәһең. “Ҡуштауҙа сеймал сифатһыҙыраҡ” тигән булып фәстерәләр. Предприятие етәкселәре оятһыҙлыҡтың сигенә сыҡҡан, уйҙарында бары тик — продукцияның үҙҡиммәтен кәметеү, күберәк табыш, матди байлыҡ туплау. Хужалар янында тәрилкә ялап йөрөүсе әпкәләйҙәр ҙә, битарафтар ҙа бар, әлбиттә. Шуға ла капиталистар мәкерле уй-ниәттәрен тормошҡа ашырыу юлында: башҡа кешеләр хаҡында “томаналар, оҙаҡ уйлаусылар бер нимә төшөнөп өлгөрмәҫ” тип уйлай, хәйлә ҡора, тел менән тирмән тартыусыларҙы яллай. Эйе, еңел уйлаусылар алдаҡтарға тиҙ ышана һәм “минең өсөн барыбер” принцибы менән көн итә, сәйәси һуҡырлыҡҡа юл ҡуя.
Әлбиттә, “Сода” йәмғиәтенең хеҙмәт эйәләре йәл. Улар үҙҙәренең күнегелгән тормош шарттарын һаҡлап ҡалһын өсөн “Ҡуштау — сеймал өсөн шәп тау” тигән фекерҙе етәкселәренең башына тыңҡыслап һалырға тейеш. Бер “КамАЗ” сеймал ҡулланып ҡарамайынса, бер үк төрлө таш хаҡында “быныһы — яраҡһыҙ, ә быныһы бара” тип фекер йөрөтөү, минеңсә, мәғәнәһеҙлек. Эшһеҙ ҡалмайым, аҙмы-күпме аҡса тупларлыҡ урындан ҡыҫҡартылмайым, балаларымды уҡытайым (һәйбәт кеше тәрбиәләү төп маҡсат түгел), сит ил машинаһы алайым, торлаҡ хәстәрләйем тип йәшәй бөгөн завод эшселәре. Әммә Аллаһы Тәғәлә һағында булған Йөрәктауыбыҙға ла, Торатауыбыҙға ла бер кем дә ҡул һонмаҫ тип өмөтләнәм. Изге тауҙарыбыҙ киләсәк быуын өсөн кәрәк. Улар — Башҡортостаныбыҙҙың ҡото-ҡалҡаны!