“Коллектив менән — “Башҡортостан”ға!” акцияһы ифрат уңышлы башланғыс булды. Уның аша гәзитебеҙҙең абруйына, дуҫтарыбыҙҙың күплегенә тағы ла бер инандыҡ һәм был беҙҙе халыҡҡа нығыраҡ яҡынайтты.

Акция дауам итә. Элекке кеүек, уға беренсе булып ҡушылған коллектив “Башҡортостан” гәзите редакцияһынан бүләк аласаҡ. Мәҫәлән, үткән подписка һөҙөмтәһе буйынса Архангел районының Тирәкле мәктәбе ошондай бәхеткә өлгәште — балалар уҡытыусылары менән бергә Өфөлә сәйәхәттә булып ҡайтты. Ҡунаҡтар иң тәүҙә “Башҡортостан”дың баш мөхәррире Нияз Сәлимов менән осрашып, баҫманың, журналистарҙың ниндәй эшмәкәрлек алып барыуы хаҡында күп мәғлүмәт алды. Тәьҫораттар баҫыу цехында тағы ла көсәйҙе — уҡыусылар ғына түгел, уҡытыусыларҙың байтағы гәзит-журналдың донъя күргәнгә тиклем ниндәй юл үткәненә тәүге тапҡыр шаһит булып, хайран ҡалыуын йәшерә алманы. “Йәшлек”, “Йәншишмә” гәзиттәре редакциялары менән танышыу ҙа матур хәтирәләр ҡалдырҙы.
Тирәкле мәктәбендә 1997 йылдан умартасылыҡ серҙәренә өйрәтәләр. 2004 йылда, яңы бинаға күскәс, Башҡортостандың Умартасылыҡ һәм апитерапия үҙәге етәксеһе Әмир Ишемғолов изге шөғөлдө үҫтереү өсөн уҡыу йортона матди ярҙам күрһәткән. Шуға ла күптәнге таныштар ҡыуанып күреште. Әмир Миңнәхмәт улының һөйләгәндәрен ҡыҙыҡһынып тыңлаған уҡыусылар умартасылыҡ буйынса яңы мәғлүмәткә эйә булды, етәксенән бүләктәр алып һөйөндө.
Артабан тирәклеләрҙе “Тамыр” балалар һәм үҫмерҙәр телеканалында ихлас ҡаршы алдылар. Ҡунаҡтарыбыҙға “йондоҙ”ҙар менән яҡындан танышыу, “Сәңгелдәк”, “Шәп арба” кеүек яратып ҡараған тапшырыуҙарҙың нисек әҙерләнеүен күреү бәхете тейҙе.
Кискә хөрмәтле милләттәшебеҙ, әҙип һәм дәүләт эшмәкәре Рауил Бикбаев менән осрашыу көтә ине. Һөйләшеү башҡорт теле, халыҡ мәсьәләләре, йәштәрҙең бөгөнгө тормошта тотҡан роле хаҡында барҙы. Уҡыусылар үҙен ҡыҙыҡһындырған бихисап һорауға яуап алһа, Рауил Төхвәт улы йәш быуындың тәрбиәле, рухлы булыуына һөйөндө. М. Кәрим исемендәге Милли йәштәр театрында әҙиптең “Хазина” спектаклен ҡарау ике быуынды тағы ла яҡынайтты, уртаҡ тойғоларҙы көсәйтте кеүек.
Тирәклеләр Өфөнөң иҫтәлекле урындарында булды, фотоға төштө, ғөмүмән, баш ҡаланан ифрат матур тәьҫораттар менән ҡайтты.
Бына шулай халҡыбыҙға өлгө күрһәтте тирәклеләр. Уларҙағы рух, милләтебеҙ өсөн янып йәшәү һәр беребеҙгә хас булһын ине.
“Коллектив менән — “Башҡортостан”ға!” акцияһына берҙәм ҡушылайыҡ, хөрмәтле дуҫтар!

Эльвира ХӘСӘНОВА, Тирәкле мәктәбенең тарих уҡытыусыһы:

— Өфөгә сәйәхәт беҙгә лә, уҡыусыларға ла ныҡ оҡшаны. Үҙемә килгәндә, мәҫәлән, типографияла беренсе тапҡыр булдым. Гәзит-журналды ҡулына алған кеше уны сығарыуҙа шул ҡәҙәр күп көс түгелгәнен, бихисап хеҙмәткәр ҡатнашҡанын күҙ алдына ла килтермәй. Ә беҙ быны яҡындан күреп ҡайттыҡ — баҫма матбуғатҡа һөйөүебеҙ тағы ла артты.
Баш ҡалабыҙ йылдан-йыл матурая, замансаға әйләнә бара. Ауылдағы мәшәҡәттәрҙән арынып, унда гел барып йөрөп тә булмай. Күңелдәге ошо бушлыҡты тултырыу, Өфөлә рәхәтләнеп ял итеп ҡайтыу мөмкинлеген булдырған “Башҡортостан” гәзитенә ҙур рәхмәт!