1925 йылда Туймазыла беренсе фельдшер пункты барлыҡҡа килә. Ағас бинаның бер өлөшөндә фельдшер менән санитар халыҡты ҡабул иткән, икенсе яғында медицина хеҙмәткәрҙәре йәшәгән. Яҡын-тирәләге ашығыс ярҙамға мохтаж ауырыуҙарға аҡ халатлылар ат арбаһына ултырып барып еткән. Бөгөн Туймазы үҙәк район дауаханаһы ауырыуҙарға һанаулы минуттар эсендә ваҡытлы ярҙам күрһәтеү ҡеүәтенә эйә.

2011 — 2012 йылдарға Башҡортостан Республикаһының һаулыҡ һаҡлау системаһын яңыртыу программаһына ярашлы, былтыр травматология бүлексәһендә Юл-транспорт ваҡиғаһында зыян күреүселәргә ярҙам итеү үҙәге асылған. Унда тиҫтәләрсә ғүмер һаҡлап алып ҡалынған.
Быйыл ғинуарҙа беренсел ҡан тамырҙары бүлексәһе барлыҡҡа килгән. Ул мейелә ҡан әйләнеше боҙолған һәм киҫкен миокард инфаркты кисергән ауырыуҙарға ярҙам күрһәтә. Ошо маҡсатҡа 60 койка ҡаралған.
— Бындай пациенттарҙы "ашығыс ярҙам" машинаһынан дауаханаға алып килеп еткереү ваҡыты һәм тикшереү саралары ҡәтғи билдәләнгән. Мәҫәлән, инсульт кисереүсенең маршруты шунан ғибәрәт: "ашығыс ярҙам" машинаһында килтерелгәс (бригада өс минут эсендә күрһәтелгән адресҡа юлланырға тейеш), компьютер томографында тикшеренеү үтә, невролог консультацияһын ала һәм көсөргәнешле терапия йәки операция бүлексәләрендә дауа ала. Ошо юлды үтеү 40 минуттан да ашмаҫҡа тейеш. Шул осраҡта ғына сирленең һауығыу ваҡытын тиҙләтеү һәм уны элекке хәленә ҡайтарыу мөмкин,— ти район дауаханаһының баш табибы Зәбир Ғиздәтуллин. — Миокард инфарктына дусар булғандарҙы терапевт менән кардиолог ҡаршы ала һәм кисекмәҫтән ярҙам күрһәтә.
Физик мөмкинлектәрҙе тергеҙеү инсульттың икенсе көнөндә үк башлана. Был эште махсус ойошторолған бригада башҡара. Төркөмгә нейрохирург, невролог, логопед, медицина психологы, дауалау физкультураһы табибы, физиотерапевт, рефлексотерапевт, массажист йәлеп ителгән.
Заман талаптарына яуап биргән бындай бүлексәләрҙә 130 мең кешенән торған Туймазы ғына түгел, күрше Шаран һәм Баҡалы райондары халҡын да дауалайҙар.
"Ауыл табибы" программаһы ла төбәк халҡына оло шатлыҡ алып килгән. Быйыл Серафимов, Ҡандра, Собханғол, Түбәнге Троицк ауылдарына 19 белгес — теш табибы, хирург, терапевт, педиатр һәм эндокринологтар ҡайтҡан. Районда йәнә терапевт, педиатр, акушер-гинеколог кеүек белгестәргә ҡытлыҡ бар. Был йәһәттән туймазылар Башҡорт дәүләт медицина университетында белем алыусы 18 йәш яҡташына өмөт бағлай.